Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում Մխիթար Պապոյանի նախագահությամբ պետք է շարունակվեր բանդայի գործով դատաքննությունը: Սակայն նիստը կարճ տևեց ու հետաձգվեց Քյարամ Ամոյանի շահերի պաշտպան Սամվել Հովհաննիսյանի բացակայության պատճառով: Պաշտպանը գրություն էր գրել, թե զբաղված է ու ներկայանալ չի կարող: Ի դժգոհություն ներկա պաշտպանների՝ հաջորդ դատական նիստը նշանակվեց վաղը: Հրապարակվեց սեպտեմբերի 6-ին մահացած Արման Դալլաքյանի հոր դիմումը դատարանին, որով դիմումատուն հայտնում էր, թե իր որդին անմեղ է եղել: Խնդրվում էր Դալլաքյանի մասով գործի վարույթը կարճել ոչ թե ամբաստանյալի մահվան, այլ արդարացման հիմքով: Հաջորդ նիստին կքննարկվի նաև ամբաստանյալներ Դավիթ Գալստյանի, Արթուր Մանուկյանի և Սամվել Դավթյանի կողմից դատական նիստերի դահլիճում սեպտեմբերի 9-ին կատարած ինքնավնասման համար կիրառվելիք սանկցիայի հարցը:
Հիշեցնենք, որ սեպտեմբերի 9-ի նիստի ժամանակ ամբաստանյալ Դավիթ Գալստյանը սրիչով վնասել էր իր որովայնի շրջանը, ապա նրան էին միացել Արթուր Մանուկյանն ու Սամվել Դավթյանը:
Հիշեցնենք նաև, որ Արտուշ Հակոբյանը, Դավիթ Գալստյանը, Սամվել Դավթյանը, Արման Դալլաքյանը, Արթուր Մանուկյանը, Քյարամ Ամոյանը մեղադրվում են կայուն կազմակերպված հանցավոր խմբի կազմում 2011 թվականի մայիս-սեպտեմբեր ամիսներին ավազակային հարձակումներ կատարելու համար:
2011 թվականի սեպտեմբերի լույս 23-ի գիշերը, ըստ նախաքննական մարմնի՝ հերթական ավազակային հարձակմանը նախապատրաստված ավազակախումբը վնասազերծվել էր:
Ավազակախմբի կազմակերպիչներից՝ Գուրգեն Հայրապետյանը բարձունքից վայր էր ընկել ու մահացել: Խմբի վերոթվարկյալ անդամները ձերբակալվել էին:
Հարձակումների թիրախ էին դարձել խմբի կողմից առանձնացված, ունևոր համարված մարդիկ՝ Ատոմ Ղազազյանը, Էդուարդ Բեզոյանը, Աղվան Գրիգորյանը, Նապոլեոն Ազիզյանը: Հարձակումներն իրականացվել էին վերջիններիս առանձնատների վրա:
