Մահացել է «Գաֆեսճյան ընտանիք» հիմնադրամի նախագահ, «Գաֆեսճյան» արվեստի կենտրոնի հիմնադիր, ամերիկահայ նշանավոր բարերար Ջերարդ Գաֆեսճյանը:
Նա իր կարողությունը հեշտ չի ձեռք բերել և մանավանդ՝ զուտ անձնական հաճույքների համար չի գործադրել, այլ՝ հանրային բարօրության, հատկապես հանուն հայության ու Հայաստանի բարօրության:
Ծնվել ու մեծացել է Նյու Յորքի Բրուքլին թաղամասում, Սվազից Հայոց ցեղասպանության տարիներին Ամերիկա ներգաղթած Լևոն և Նորա Գաֆեսճյանների ընտանիքում: Դժվարին մանկություն է ունեցել: Նա մեծացել, իրավաբանական բարձրագույն կրթություն է ստացել և կյանք է մտել իբրև իսկական հայ ու հայրենասեր, իբրև եղեռնազարկ ժողովրդի վերապրող շառավիղ՝ հոգու և մտքի մեջ մշտապես կրելով իր ժողովրդի ցավը և այդ ցավին դարման անելու ներքին մղումը:
Նրա ամենամեծ հավաքածուն համաշխարհային համբավ նվաճած վարպետների ապակյա ստեղծագործություններն են: Միացյալ Նահանգների կառավարությունը քիչ ջանք չի թափել և քիչ գումարներ չի առաջարկել, որ այդ իսկապես անզուգական ստեղծագործությունների ցուցադրման թանգարանը կառուցվի ԱՄՆ-ում:
Լայն են եղել հայրենիքում տնտեսական գործունեություն ծավալելու Գաֆեսճյան-գործարարի հետաքրքրությունները: Նրա ֆինանսավորմամբ Երևանում ստեղծվել է «Սոլարեն» ընկերությունը, որը հայ գիտնականների տաղանդի ու իր իսկ միջոցներով ձեռք բերված արտասահմանյան առաջավոր տեխնոլոգիաների օգտագործմամբ պետք է մեր քամուց մեզ համար էլեկտրաէներգիա ստանա: Գաֆեսճյանը միլիոնավոր դոլարներ է ներդրել նաև արևային կուտակիչների, մարտկոցների, էներգիայի հիդրոգեն աղբյուրների ստեղծման ծրագրում, որի իրականացման համար հիմնել է «H 2 Economy» ընկերությունը:
Ջերարդ Գաֆեսճյանը մեծ հակում է ունեցել դեպի օբյեկտիվ, ազնիվ, անկախ լրատվությունը, դա չափազանց կարևոր է համարում հայրենիքում քաղաքացիական ազատ հասարակություն կառուցելու համար, ահա ինչու դարձել է «Արմենիա» հեռուստաընկերության բաժնետերերից մեկը և մանավանդ տեխնիկական առումով հեռուստաընկերությունը հարստացնելու ուղղությամբ անգնահատելի աշխատանք է կատարել: