Ինչպես տեղեկացնում են «Հրապարակ» օրաթերթի իշխանական աղբյուրները, դեռ երեք ամիս առաջ ՀՀԿ ԳՄ նիստերից մեկում Սերժ Սարգսյանը ոչ բաց տեքստով, սակայն լիովին հասկանալի ասել է, որ պետք չէ բացառել ՀՀ անդամակցությունը Մաքսային միությանը:
Ավելին՝ հենց այդ օրերին արդեն իսկ հասկանալի էր, որ «վերազգային» այդ մաիմնի՝ Մաքսային, համապատասխանաբար՝ Եվրասիական միության հետ տնտեսական հարաբերությունների կուրատորը լինելու է ՀՀ նախագահի աշխատակազմի նախկին ղեկավար Կարեն Կարապետյանը, որը, որպես ռուսական կողմնորոշման գործիչ, հնարավոր է զբաղեցնի հայաստանյան կառույցի ղեկավարի պաշտոնը: Առավել մանրամասն կադրային տեղաշարժերը կուրվագծվեն հոկտեմբերին սկսվելիք Մաքսային միությանն անդամակցության շուրջ բանակցությունների ավարտից հետո միայն:
Այն ժամանակ էլ կորոշվի, թե պարտականությունների ու լիազորությունների ինչ շրջանակ է այն ընդգրկելու: Որոշ գնահատականներով՝ կառույցը «բավականին տպավորիչ» է լինելու, որովհետև, ինչպես ՄՄ-ն, այնպես էլ Եվրասիական միությունն ունենալու է իր նախարարությունները, հանձնակատարը, կոմիտեները:
