Աջափնյակ և Դավթաշեն վարչական շրջանների ընդհանուր իրավասության դատարանում Դավիթ Բալայանի նախագահությամբ ավարտվել է Հուսիկ Հովսեփյանի գործի դատավարությունը:
63-ամյա Հուսիկ Հովսեփյանը հյուսնի օգնական է ազգային գրադարանում: Միաժամանակ նա սկեսրայր է: Ահա այս «պաշտոնն» է, որում Հուսիկը թերացել ու կատարել է հանցավոր ոտնձգություններ:
Ըստ դատական ակտի՝ Հուսիկ Հովսեփյանը 2013 թվականի մայիսի 13-ին, ժամը 11-ն անց 40-ի սահմաններում Դավթաշենի բնակարանում վիճաբանության ժամանակ ծեծի է ենթարկել իր հարսին՝ պատճառելով մարմնական վնասվածք՝ աջ բազկի ստորին երրորդականի առաջնային մակերեսի արյունազեղման ձևով:
Նմանատիպ արարք Հուսիկը կրկնել է օրեր անց՝ մայիսի 17-ին, ժամը 14-ի սահմաններում: Հարսին ծեծելով՝ Հուսիկը նրան պատճառել է ֆիզիկական ցավ:
Նախաքննական մարմինը երկու հանցավոր արարքների համար Հուսիկ Հովսեփյանին մեղադրանք է առաջադրել ՀՀ քրեական օրենսգրքի 118 հոդվածով:
Ընդհանուր իրավասության դատարանում Հուսիկ Հովսեփյանն իրեն մեղավոր է ճանաչել ու զղջացել: Գործը քննվել է արագացված կարգով:
Հուսիկ Հովսեփյանը վերջին հաշվով դատապարտվել է 100 հազար դրամ տուգանքի:
