Աջափնյակ և Դավթաշեն վարչական շրջանների ընդհանուր իրավասության դատարանում Դավիթ Բալայանի նախագահությամբ քննվելու է Կարինե Շիրակունու գործը:
61-ամյա Կարինե Շիրակունին, ըստ առաջադրված մեղադրանքի, հետախուզման մեջ գտնվող կրտսեր որդու՝ Հրանտի սկսած ուսումը «ՄԷՍԻ» համալսարանի երևանյան մասնաճյուղի տնտեսագիտական ֆակուլտետի հեռակա բաժնում չընդհատելու խնդրանքով, հանդիսանալով այդ համալսարանի գանձապահ, դիմել է պրոֆեսորադասախոսական և վարչակազմակերպչական կազմի աշխատողներին:
Կարինեն, ըստ մեղադրանքի, համաձայնության է եկել իր ավագ որդու հետ, որպեսզի Հայաստանից բացակայող կրտսեր որդու փոխարեն ավագը սովորի համալսարանում և ավարտի այն՝ կրտսերի անունով ստանալով ավարտական դիպլոմը:
Մեղադրանքի համաձայն՝ Կարինե Շիրակունին կազմակերպել է վերոհիշյալ գործընթացը, սակայն իր կամքից անկախ պատճառներով կատարված կեղծիքները բացահայտվել են, ու Հրանտ Սարգսյանի անունով դիպլոմ չի տրամադրվել:
Կարինե Շիրակունին մեղադրվում է ՀՀ քրեական օրենսգրքի 34-325 հոդվածի 2-րդ մասով:
Ինչի ասես, որ պատրաստ չեն մայրիկները հանուն այն բանի, որ սիրասուն զավակները, սովորելու նեղություն չկրելով՝ դիպլոմավորվեն, հետո ծանոթի միջոցով մի լավ տեղ աշխատանքի տեղավորվեն ու առանձնապես իրենց նեղություն չտալով՝ լավ պաշտոնների էլ հասնեն՝ որպես «ուսանած» ու դիպլոմավորված «մասնագետներ»:
