2014թ. «Ոսկե գլոբուս»-ում հերթական անգամ կհանձնեն Սեսիլ Բ. Դե Միլի մրցանակը: Կինեմատոգրաֆում ունեցած ներդրման համար մրցանակի դափնեկրին որոշում է արտասահմանյան մամուլի հոլիվուդյան ասոցիացիան: 2014թ. մրցանակը կստանա Վուդի Ալենը, հաղորդում է filmpro.ru-ն:
Հոլիվուդում արտասահմանցի լրագրողների մրցանակն առաջին անգամ շնորհվել է 1952թ., այդ ժամանակ դափնեկիր է դառնում Սեսիլ Բ. Դե Միլը, ում պատվին էլ կոչվում է այդ ժամանակ անուն չունեցող մրցանակը: Մրցանակի դափնեկիրների թվում են եղել Ուոլթ Դիսնեյը, Ալֆրեդ Հիչքոկը, Օդրի Հեփբերնը, Քլինթ Իսթվուդը և այլք:
Այս տարի մրցանակը կշնորհվի Վուդի Ալենին, ով վերջերս թողարկել է «Ժասմին» կատակերգական դրաման` Քեյթ Բլանշետի մասնակցությամբ: Վարպետի նոր ֆիլմը պատմում է աշխարհիկ կնոջ մասին, որը զրկվելով կարողությունից, ստիպված է լինում տեղափոխվել իր քրոջ բնակարան:
Մրցանակի ապագա դափնեկրի արվեստը այլ ռեժիսորների ոգեշնչում է ստեղծել ինչպես խաղարկային, այդպես էլ փաստագրական ֆիլմեր: 2012թ. Ռոբերտ Ուայդը նկարահանել է «Վուդի Ալեն» ֆիլմը, նույն թվականին Սոֆի Լելուշը ներկայացրեց «Փարիզ-Մանհեթեն» ֆիլմը, որի գլխավոր հերոսուհին Ալենի երկրպագուհին է:
