Ամերիկյան ԶԼՄ-ներում տեղ գտած շահարկումներն այն մասին, որ նախագահ Դոնալդ Թրամփը ՌԴ արտգործնախարար Սերգեյ Լավրովի հետ Սպիտակ տանը հանդիպման ժամանակ իբրև գաղտնի տեղեկություն է փոխանցել, ստիպում է ենթադրել, որ ԱՄՆ-ում ձեռնարկվում է պետական հեղաշրջման փորձ: Նման կարծիք է հայտնել CNBC հեռուստաընկերության քաղաքական մեկնաբան Ջեյք Նովակը՝ մեկնաբանելով այն պնդումները, թե անցած շաբաթ ԱՄՆ-ի ղեկավարը ՌԴ ԱԳ նախարարին գաղտնի տեղեկություններ է փոխանցել ահաբեկչության դեմ պայքարի հարցերի վերաբերյալ:
«Դա իրոք տեղեկատվական ռումբ է»,-նշել է Նովակը: Սակայն, նա ընդգծել է, «խոսքն այն մասին չէ, որ նախագահ Թրամփը ինչ-որ հանցագործություն է կատարել»: «Նորությունը, որն իրոք պետք է անհանգստություն առաջացնի, այն է, որ Միացյալ Նահանգների օրինականորեն ընտրված նախագահի դեմ, ինչպես երեւում է, քաղաքական հեղաշրջման փորձ է ձեռնարկվում»,-նշել է CNBC-ի մեկնաբանը:
Նա ասել է, որ ներկայիս սկանդալն սկսվեց այն բանից հետո, երբ «ամենաբարձր մակարդակով ինչ-որ մեկը կառավարությունում տեղեկատվության արտահոսք սարքեց այն քննարկումների վերաբերյալ, որոնք Թրամփն ունեցել է Ռուսաստանի ներկայացուցիչների հետ»: «Դա պոտենցիալ առումով շատ լուրջ հանցագործություն է, և դա տեղի է ունենում արդեն ոչ առաջին անգամ»,-հիշեցրել է Նովակը:
