Մայիսի 16-ին Վաշինգտոնում՝ Թուրքիայի դեսպանատան մոտ, մի խումբ հայեր բողոքի ակցիա էին կազմակերպել թուրք նախագահ Ռեջեփ Թայիփ Էրդողանի Միացյալ Նահանգներ այցելության դեմ: Հայերին միացել էին նաև քրդեր և եզդիներ:
Ինչպես տեղեկանում ենք ԱՄՆ Հայ դատի հանձնախմբի ֆեյսբուքյան էջից, հակացույց էին կազմակերպել նաև Վաշինգտոնի թուրքական կազմակերպությունները, որոնք այս կերպ ցանկացել են իրենց աջակցությունը հայտնել Էրդողանին: Ակցիայի ժամանակ թուրքերը, ճեղքելով ոստիկանական ուժերին, հարձակվում են խաղաղ ցույց իրականացնող հայկական, քրդական համայնքի ներկայացուցիչների վրա և սկսում հարվածել նրանց: Asbarez-ի տեղեկություններով՝ առնվազն 3 մարդ մարմնական վնասվածքներով տեղափոխվել է հիվանդանոց, կան ձերբակալվածներ:
«Սա այնպիսի բռնություն էր, որ երբեք չեք սպասի տեսնել ԱՄՆ մայրաքաղաքում: Սա այնպիսի բռնություն էր, որ կարելի է տեսնել Էրդողանի Թուրքիայում և այլ բռնապետություններում»,- ասել է Հայ դատի հանձնախմբի գործադիր տնօրեն Արամ Համբարյանը
Ավելի վաղ Հայ դատի հանձնախումբը ևս հայտարարություն էր տրածել Էրդողանի Վաշինգտոնի այցի կապակցությամբ: «Սա նախագահ Թրամփի հնարավորությունն է դեմ դուրս գալու Էրդողանին: Ժամանակն է մարտահրավեր նետել Էրդողանի սպառնալիքներին և թուրքական կառավարության քողարկված արշավին, որը միտված է ազդել ԱՄՆ քաղաքականության վրա օտարերկրյա գործակալներին, լոբբիստներին ու ազդեցություն ունեցող այլ անձանց տրվող խնդրահարույց վճարումների միջոցով: Նա կարող է առաջնահերթ համարել ամերիկյան սկզբունքները և մերժել ԱՄՆ կողմից Հայոց ցեղասպանության հիշատակմանն ուղղված Թուրքիայի արգելքը»,- ասվում է հայտարարության մեջ:
