Google ընկերությունն իր որոնողական համակարգում առաջարկում է նոր ծառայություն, որի միջոցով այսուհետ հնարավոր է գտնել չվերթների մասին տեղեկություններ: Դրա համար անհրաժեշտ է որոնման դաշտում նախ հավաքել «չվերթներ», ապա հերթականությամբ մեկնման օդանավակայանը, որից հետո ժամանման օդանավակայանը: Այս մասին գրում է Google-ի պաշտոնական բլոգը:
Այս որոնումն իրականացնելիս օգտատերը կստանա ուղիղ չվերթների ցուցակն առաջիկա օրերի համար: Ծառայությունը հասանելի է 11 լեզուներով, այդ թվում՝ անգլերեն, ֆրանսերեն, իտալերեն, գերմաներեն, իսպաներեն, ֆլամանդերեն, պորտուգալերեն, լեհերեն, թուրքերեն և կատալոներեն:
Google-ը հայտարարել է, որ դեռ հնարավոր չէ օգտվել ITA Software ծառայությունից, որը հնարավորություն է տալիս օնլայն ավիատոմս կամ զբոսաշրջային փաթեթ գնել: Թեպետ ITA Software-ն անցյալ տարի 700 միլիոն դոլարով գնվել է Google-ի կողմից, սակայն միայն նախորդ ամսին են ԱՄՆ իշխանությունները այն շահագործելու համաձայնություն տվել:
