Գերմանիայում գրանցվել է սեռական բնույթի հանցագործությունների թվի կտրուկ աճ: 2016թ. երկրում գրանցվել է բռնաբարության 7 հազար 919 դեպք, ինչը 12.8%-ով գերազանցում է 2015թ. ցուցանիշները: Ռեկորդային աճ է գրանցել (106.3%) խմբակային բռնաբարությունների թիվը՝ 275-ից 524: Այս մասին հաղորդում է Bild պարբերականը՝ նշելով, որ պատասխանատվության է ենթարկվում միայն յուրաքանչյուր երրորդ չարագործը: Աճել է նաև բռնաբարության նպատակով հարձակումների թիվը:
Պարբերականի փոխանցմամբ՝ վերոնշյալ հանցագործությունների համար ձերբակալվածների շուրջ կեսը Գերմանիայի քաղաքացիներ չեն եղել:
Գերմանիայի քրեական ոստիկանության միության ղեկավար Անդրե Շուլցը կարծում է, որ խմբակային բռնաբարությունների թվի աճը չի կարող անհանգստություն չառաջացնել: «Հանցագործությունների մեծ մասն իրականացվել է ամանորյա գիշերը Քյոլնում և տաս այլ քաղաքներում: Բայց խմբակային բռնաբարությունների մի մասն էլ տեղի է ունեցել տարվա ընթացքում: Այս ամենը անհանգստություն է առաջացնում այնպես, ինչպես ոչ գերմանական ծագում ունեցող հանցագործների մեծ թիվը»,-հավելել է Շուլցը:
