Ռուս ուղղափառ եկեղեցու քահանա Վսեվոլոդ Չապլինը եկեղեցու կողմից շնորհակալություն է հայտնել Մոսկվայի քաղաքապետարանին և ոստիկաններին նույնասեռական ցույցը ցրելու համար: Interfax-ին տված հարցազրույցի ժամանակ նա նշել է, որ ոստիկանները շատ կոռեկտ ցրել են նույնասեռականության քարոզիչներին:
Չապլինը, որը գլխավորում է Եկեղեցու և հասարակության միջև համագործակցության բաժինը հույս է հայտնել, որ այսուհետ ռուսական իշխանությունները պետք է լսեն իրենց ժողովրդի ձայնը, որի մեծամասնությունը դեմ է նման դրսևորումներին, այլ ոչ թե ընկրկի այն արտաքին ճնշումներից, որոնք տեղի են ունեցել և այդ ցույցից առաջ, և դրանից հետո: Ամենայն հավանականությամբ նա նկատի է ունեցել Մարդու իրավունքների եվրոպական դատարանի վճիռը, որն անօրինական է համարել նույնասեռականների ցույցի անցկացման արգելման նախորդ 5 տարիների որոշումները:
Քահանան նաև դեմ է հանդես եկել ուղղափառ ակտիվիստների ձերբակալմանը, որոնք բողոքում էին այս ակցիայի դեմ: «Ուղղափառ հոգևորականները խաղաղ բողոքի իրավունք ունեին, և, ինչքանով ես եմ տեղեկացված, այդ ցույցը կրել է խաղաղ բնույթ. մարդիկ իրենց կարծիքն են հայտնել տեղի ունեցող իրադարձության վերաբերյալ, ասել են, որ նույնասեռականությունը չարիք է, և որ հասարակությունը պետք է պայքարի դրա դեմ»,- գործակալությանն է հայտարարել Չապլինը:
Նույնասեռականները ցույց անցկացնելու փորձեր են կատարել մայիսի 30-ին՝ սկզբում Մանեժնի հրապարակում, հետո՝ Տվերսկայա փողոցում: Մոսկվայի քաղաքապետարանը հրաժարվել է արտոնել այն: Պաշտոնական տվյալներով, ձերբակալվել է 61 մարդ՝ և՛ նույնասեռականներից, և՛ նրանց հակառակորդներից:
Ռուստամ Ադագամովի նկարահանած տեսանյութից երևում է, թե ինչպիսի դաժանությամբ են ոստիկանները ձերբակալություններն իրականացրել: Բացի այդ, կադրերից դատելով՝ երևում է, որ ակտիվիստներին ձերբակալում են ոչ միայն ոստիկանները, այլև քաղաքացիական հագուստով ինչ-որ մարդիկ: Ստորև ձեզ ենք ներկայացնում նույնասեռականների և ուղղափառների բախման կադրեր: