«Թալիբան» ծայրահեղական շարժման գրոհայինները ստանձնել են Աֆղանստանի Հերատ քաղաքում ԱՄՆ հյուպատոսության վրա հարձակման պատասխանատվությունը: Այս մասին հաղորդում է Xinhua գործակալությունը:
Ուրբաթ առավոտյան Հերատում, որը նույնանուն մարզի վարչական կենտրոնն է, գրոհայինները երկու ականապատ մեքենա են պայթեցրել ԱՄՆ հյուպատոսության շենքի մոտ, որից հետո շուրջ հինգ մահապարտ ահաբեկիչներ ներխուժել են համալիրի տարածք և փոխհրաձգություն սկսել դիվանագիտական ներկայացուցչության անվտանգության ծառայության աշխատակիցների հետ: Մարտի ընթացքում ոչնչացվել է առնվազն երկու գրոհային, զոհվել են նաև անվտանգության երկու աֆղան աշխատակից և մեկ խաղաղ բնակիչ: Դեպքի հետևանքով վիրավորվել է շուրջ 20 քաղաքացի:
Քաբուլում ԱՄՆ դեսպանատան տեղեկատվության համաձայն՝ հյուպատոսությունում աշխատող օտարերկրացիների շրջանում զոհեր և վիրավորներ չկան: Թալիբների ներկայացուցիչն իր հերթին հայտարարել է, որ գործողության ընթացքում զոհվել են ԱՄՆ մի քանի քաղաքացիներ: