Թուրքական Doğan լրատվական գործակալության փոխանցմամբ, այսօր տեղական ժամանակով 12.00-ին Թուրքիայի ածխահանքերից մեկում փլուզում է տեղի ունեցել, ինչի արդյունքում զոհվել է 1 և ծանր վնասվածքներ ստացել երեք հանքափոր։
Դեպքը տեղի է ունեցել երկրի հարավարևելյան քրդաբնակ Շըրնաք նահանգում՝ Շըրնաք-Ջիզրե ավտոմայրուղուց 11 կիլոմետր հեռավորության վրա ընկած ածխահանքում։ Հողի տակ մնացած 42-ամյա Աբաս Գյուլերը զոհվել է, իսկ Սեյֆեթին Գյուլերը, Մեթին Գյուլերն ու Մեհմեթ Աքյուրեքը ծանր վնասվածքներ են ստացել։
Վիրավոր հանքափորներին փոխադրել են Շըրնաքի պետական հիվանդանոց։
Դեպքի կապակցությամբ տեղաբնակները նշում են, որ երեկ, ժամը 14:02-ին քաղաքում գրանցվել է 4.6 բալանոց երկրաշարժ, և բացառված չէ, որ ածխահանքի փլուզումը կապված է դրա հետ։
