«Առաջին լրատվական»-ի զրուցակիցն է ԱԻՄ առաջնորդ Պարույր Հայրիկյանը։
-Պարոն Հայրիկյան, Երևանի ավագանու ընտրություններին որևէ քաղաքական ուժի սատարելու որոշում ունե՞ք։
–Մեր որոշումն այսպիսին էր՝ եթե ոչ իշխանական ուժերը միավորվելու համաձայնության գային, ապա սատարել նրանց համաձայնությանը։ Բայց առանձին-առանձին մենք համարում ենք տարօրինակ, եսակենտրոն, անհեռանկարային և նաև անխոհեմ։ Այնպես որ, մնացինք գյուղական ընտրություններին կողքից հետևող քաղաքական ուժ։
-Խորհրդարանական ընտրություններին կոչ արեցիք անվավեր դարձնել քվեաթերթիկը, հիմա ի՞նչ կոչ կունենաք։
-Մենք հստակ ասել ենք՝ Հայաստանում հարցերի հարցը Սահմանադրությունն է։ Արդեն նախաձեռնել ենք քննարկումները, երեք կուսակցություն նախնական համաձայնություն է տվել։ Բայց ԱԻՄ-ի ղեկավարությունը շատ վճռական չի տրամադրված այդ ստորագրահավաքի հարցում, հիմա դա ենք քննարկում։ Մնացած ամեն ինչ համարում ենք ստվերային, մարտավարականից ցածր մակարդակի։ Մեծ գյուղի ընտրությունները համարում ենք տասերորդական, եթե դա մեծ համազգային փոփոխություններ նախատեսող առաջին քայլը չէ։ Մեկ դեպքում կարող էր լինել՝ եթե Զարուհին ու Նիկոլը գային համաձայնության։ Կամ Նիկոլն ասեր՝ քանի որ Զարուհին թեկնածությունը դրել է՝ պաշտպանենք Զարուհուն։ Այդ դեպքում մենք կիմանայինք, մեզ հետ էլ երկու կուսակցություն։
-Ասացիք՝ հիմա այլ կուսակցությունների հետ քննարկումներ եք տանում, ո՞ր ուժերի մասին է խոսքը։ Դեմկուսի՞։
-Այդպիսի հստակ մոտեցում չի եղել։ Զանգել ասել են՝ համաձայն ենք, որ այդպիսի ծրագրով ասպարեզ գանք։ Այո՛, Դեմկուսը ու Միավորված կոմկուսը։ Մյուսներին չենք ասել, նախնական իրենց հետ ենք խոսել, հետևել են հայտարարություններին ու ասել՝ այո, կարևոր հարց է, բայց ոչ միակը։
Բայց նախորդ մեր նիստի ընթացքում ձայների առավելություն չստացանք։ Մարդիկ ասում էին՝ այս ընդունված Սահմանադրությունը հստակ չի դնում, որ 200.000 ստորագրության դեպքում հարցը կդրվի հանրաքվեի, այդ դեպքում հարցը կքննի խորհրդարանը։ Ասում էին՝ մարդկանց կոչ անենք ստորագրեն, հետո գնան խորհրդարան, որ այնտեղ մի քանի թեթևսոլիկ իրենց անլրջությամբ չեղյալ համարեն։
-Այսինքն՝ խնդիրն ԱԻՄ-ի ներսո՞ւմ է։
-Այո, ԱԻՄ-ի նախագահությունն ունի 14 անդամ, որից 6-ն ասաց, որ համաձայն չէ։ Յոթերորդը Կարո Եղնուկյանն է, նա բանտում է։ Եթե Կարոյին էլ իրենց թվին դասենք՝ կես-կես է ստացվում։ Հիմա հարցն առկախված է, իրավական հարցերն ենք պարզաբանում։
-Կարո Եղնուկյանի կարծիքը կնոջ միջոցո՞վ եք փորձել ճշտել։
-Փոխանցել ենք, որ կարծիք հայտնի։ Այնպես չէ, որ միայն իր ձայնից է կախված, որովհետև 6 դեմն էլ հաջող արդյունք չէ։ Նշանակում է կա տարակարծություն, մենք ուզում ենք ավելի մեծ համաձայնության գանք, չենք ուզում չնչին մեծամասնություն լինի։
-Իսկ այլ ուժերի առաջարկներ արե՞լ եք, թե՞ նախորդ դաշինքների փորձով չեք ուզում, որ այս նախաձեռնությունն էլ տապալվի։
-Ամբողջ հարցն այն է, որ մենք այս հարցում համակարծիք ենք։ Այնպես չէ, որ միասնական որոշում ենք ընդունել, առայժմ միայն համակարծիք ենք։ Որևէ քաղաքական ուժի հետ գործակցելը չենք բացառում։ Եթե նրանք այս սահմանադրական «բարեփոխումները» քննադատել են՝ նրանք նույնպես կարող են լինել գործընկեր։
