Բրիտանիայում կապի աշխատակիցների արհմիությունը սպառնում է գործադուլ կազմակերպել՝ կապված Թագավորական փոստի (Royal Mail) սեփականաշնորհման հետ:
Մեծ Բրիտանիայի կառավարությունը դեռ 2001 թ. հայտարարել էր, որ Թագավորական փոստը պետք է սեփականաշնորհվի, սակայն այդ ծրագիրը երկար ժամանակ չէր հրապարակվում։ Հինգշաբթի երկրի իշխանությունները պաշտոնապես հայտարարեցին Royal Mail-ի բաժնետոմսերի մի մասի վաճառքի մասին: Չնայած վաճառվելիք բաժնետոմսերի 10 %-ն անվճար հանձնվելու է Royal Mail-ի 150 հզ. աշխատակիցների տնօրինմանը՝ ճնշող մեծամասնությունը դեմ է, որ ընկերությունը սեփականաշնորհվի:
«Կապի ոլորտի աշխատակիցների արհմիությունը համարում է, որ Royal Mail-ի վաճառքի նախագիծը դավաճանություն է բրիտանական ժողովրդի հանդեպ: Բնակչության 70 %-ը դեմ է հանդես գալիս սեփականաշնորհմանը»,- ասվում է հայտարարությունում:
Հիմա արհմիությունն իր անդամների շրջանում քվեարկություն է անցկացնում գործադուլի իրականացման վերաբերյալ: Քվերակության արդյունքները հայտնի կդառնան հոկտեմբերի 3-ին, իսկ գործադուլը կարող է կայանալ հոկտեմբերի 10-ին:
