ՀՀ կրթության և գիտության նախարար Լևոն Մկրտչյանից «Առաջին լրատվական»-ը հետաքրքրվեց՝ Երևանի ավագանու առաջիկա ընտրություններին ում է սատարելու: Ի պատասխան՝ Լևոն Մկրտչյանը նշեց. «ՀՅԴ Երևանի քաղաքային կոմիտեն արդեն պաշտոնապես հայտարարել է Երևանի ավագանու ընտրություններում գործընկեր ՀՀԿ-ին սատարելու վերաբերյալ: Մենք կոչ ենք արել մեր համակիրներին իրենց ձայնը տալ Տարոն Մարգարյանի գլխավորած ցուցակի օգտին: Ինքս անձնական մտերմություն ունեմ Տարոն Մարգարյանի հետ, լավ եմ ճանաչում նրա ընտանիքին: Վստահ եմ, որ ընտանիքից նրան փոխանցված մարդկային և ազգային արժեքներն ու ավանդույթները Երևանի ու երևանցիների խնդիրների լուծման համար կարևոր նախապայման են: Կարծում եմ, որ տեղական ինքնակառավարման ոլորտում Տարոն Մարգարյանը կուտակել է մեծ փորձ, և վերջին տարիներին մայրաքաղաքում կատարվող փոփոխություններն ակնհայտ են»:
Նախարարից հետաքրքրվեցինք առաջիկայում սպասվող դպրոցների օպտիմալացումից: Ի պատասխան՝ Լևոն Մկրտչյանը նշեց, որ ԿԳՆ-ն կառավարության հանձնարարությամբ մշակում է դպրոցների զարգացման համալիր ծրագիր, որի համատեքստում քննարկվում է գերբեռնված և թերբեռնված դպրոցների գործունեության արդյունավետության բարձրացրման հարցը. «Այս գործընթացում մեզ համար առաջնային է լինելու կրթության որակը: Ծրագիրը քննարկվելու է բոլոր շահագրգիռ կողմերի հետ: Կրթության և գիտության նախարարության կողմից մշակվում են ընդհանուր չափանիշներ, որոնք դրվելու են դպրոցների համալիր զարգացման ծրագրի հիմքում»:
