Սերժ Սարգսյանի մոսկովյան հայտարարությունը ավելի շատ անորոշություն է ստեղծել, քան պատասխանել հարցերին: Այսօր Տարածաշրջանային հետազոտությունների կենտրոնի հրավիրած՝ «Հայաստանի նոր տնտեսական ուղղություն»-ը թեմայով քննարկմանն ասաց ՀԱԿ պատգամավոր Նիկոլ Փաշինյանը:
«Դժվար է ասել՝ տնտեսական իմաստով ինչ է նշանակում միանալ Մաքսային միությանը և ինչ՝ քաղաքական իմաստով: Կարելի է գտնել Բելառուսի նախագահ Լուկաշենկոյի ելույթը համացանցում, որում նա ասում է, որ Մաքսային միության կազմում Բելառուսն ունի այն նույն խնդիրները, ինչ Մաքսային միության ձևավորումից առաջ, և այդ միությունը չի աշխատում»:
Բացի այդ՝ Փաշինյանը նշեց ևս մեկ մտահոգություն. «Մաքսային միության երկրները կատարել են սահմանադրական այնպիսի փոփոխություններ, որոնք վերաբերել են նախագահի կարգավիճակին: Օրինակ՝ Ռուսաստանում կառավարման չորսամյա ժամկետը փոխարինվել է վեցի, Ղազախստանում կատարվել է այնպիսի փոփոխություն, որը ենթադրում է նախագահի ցմահ կարգավիճակ: Սերժ Սարգսյանի մոսկովյան հայտարարությունը ևս քաղաքական նպատակներ ունի»:
Փաշինյանի գնահատմամբ`այսպիսով անորոշ են Հայաստանի արտաքին քաղաքական նպատակները. «Խոսքը վերաբերում է անմիջական հարևաններին՝ Վրաստանին և Իրանին, որոնց մենք հակված ենք անվանել ռազմավարական հարևաններ: Վերջին տարիներին բավարար ջանք չի գործադրվել հատկապես Իրանի հետ հարաբերությունները բարելավելու ուղղությամբ, իսկ ինչպիսի՞ն կլինեն այսուհետ Հայաստանի հարաբերությունները Չինաստանի, ԱՄՆ-ի հետ: Սա կխանգարի Հայաստանի ինքնիշխանությանը, որովհետև ինքնիշխանությունը ենթադրում է դիվերսիֆիկացված արտաքին քաղաքականություն»:
Բանախոսի դիտարկմամբ՝ սա վտանգավոր է Հայաստանի ինքնիշխանության համար, իսկ դա պահպանելը պետք է լինի Հայաստանի թիվ մեկ խնդիրը. «Մեզ համար անընդունելի է որևէ որոշում՝ ի հաշիվ Հայաստանի ինքնիշխանության. սա ամրագրված է Հայաստանի Հանրապետության Սահմանադրության առաջին հոդվածում, որը ենթակա չէ փոփոխման: Բացի այդ` քանի դեռ չի կարգավորվել Ղարաբաղի հարցը, Հայաստանը չպետք է անդամակցի ոչ Մաքսային, ոչ էլ Եվրոպական միությանը»:
Պատկերացրեք այսօր Հայաստանին Եվրամիության անդամ: ԵՄ-ում գործող կանոնների համաձայն, այդ պարագայում Ստեփանակերտից Երևան կարելի կլինի այցելել միայն համապատասխան վիզա ստանալով, էլ չեմ ասում, որ ԵՄ անդամակցության դեպքում Հայաստանը ստիպված կլինի վիզային փոխհարաբերություններ չհաստատել չճանաչված պետության հետ:
Նիկոլ Փաշինյանի ելույթի մանրամասները դիտեք մեր տեսանյութում:
