Ադրբեջանում Versace ընկերության ներկայացուցիչ Ռամին Մովսումովը իր վերաբերմունքն է հայտնել Լեռնային Ղարաբաղում ընկերության ներկայացուցչություն բացելու կապակցությամբ:
Virtualaz.org-ին տված հարցազրույցի ժամանակ նա նշել է, որ դա իտալական ընկերություն է, և այն իրավունք ունի ներկայացուցչություն բացել աշխարհի ցանկացած երկրում:
Նշենք, որ հարցազրույցում «երկիր» բառը գրվել է մեծատառերով՝ ԵՐԿԻՐ:
«Չեմ տեսնում այստեղ ոչինչ, որը կհակասեր Ադրբեջանի շահերին: Որքան ես գիտեմ, Ստեփանակերտում բացվում է այս ընկերության ոչ թե գործարանը, այլ խանութը: Վերջերս ես հանդիպել եմ այս ընկերության նախագահ Լուիջի Անտոնիոյի հետ, և նա ասել է, որ իրենք մտադիր են ներկայացուցչություն բացել Երևանում»,- ասել է նա:
Հարցին՝ հնարավո՞ր է, որ Բաքվում փակվեն Versace-ի խանութները, Մովսումովը պատասխանել է՝ դա հնարավոր չէ:
«Իսկ ի՞նչ ենք մենք արել, որպեսզի Versace-ի խանութները փակվեն: Առավել ևս, որ մենք Ադրբեջանի շահերին հակասող ոչինչ չենք արել: Ես նաև չեմ հասկանում՝ ինչո՞ւ ադրբեջանցիները կարող են հագնել Versace հագուստ, իսկ հայերը՝ ոչ: Պետք չէ նորաձևությունը շփոթել քաղաքականության հետ»,- հավելել է նա:
Նշենք, որ ավելի վաղ Լեռնային Ղարաբաղի փոխվարչապետ Արթուր Աղաբեկյանը հայտարարել էր, որ ինչ-որ իտալական ընկերություն մտադիր է ԼՂ տարածքում պատվերներ կարել Versace նորաձևության տան համար: Նորաձևության տունը այս կապակցությամբ պաշտոնական հայտարարություն դեռևս չի արել: