Грузия Online-ի փոխանցմամբ՝ Վրաստանի արտգործնախարար Գրիգոլ Վաշաձեն Московские новости պարբերականին տված հարցազրույցի ժամանակ հայտարարել է, որ Վրաստանի նախագահ Միխեիլ Սաակաշվիլին, ինչպես նաև իշխանության այլ ներկայացուցիչներ պատրաստակամություն են հայտնել Ռուսաստանի հետ երկխոսություն սկսել յուրաքանչյուր պահին, յուրաքանչյուր վայրում և յուրաքանչյուր թեմայով.
«Արդյո՞ք Մոսկվան կընտրի երկխոսության ճանապարհը, թե՞ կշարունակի Վրաստան առաքել ահաբեկիչներ ու պայթուցիկներ, արդեն ես չեմ կարող ասել»։
Ի պատասխան այն հարցի, թե արդյո՞ք Վրաստանի կողմից չերքեզների ցեղասպանության ճանաչումը մարտահրավեր էր՝ ուղղված Ռուսաստանին, Վաշաձեն պատասխանել է. «Ռուսաստանը Հյուսիսային Կովկասում հանցագործություններ է իրականացրել ոչ միայն չերքեզների դեմ, և դա պատմական փաստ է։
Դա խոստովանել են անգամ ռուս պատմաբանները։ Չերքեզների ցեղասպանության ճանաչման վերաբերյալ Վրաստանի խորհրդարանի որոշումն այն նույն խորհրդարանի որոշումն է, որին ընտրել է վրաց ժողովուրդը։ Հնարավոր է, որ Ռուսաստանը երբևէ համաձայնի մեզ հետ, ինչպես որ տեղի ունեցավ Լեհաստանի հետ վիճելի խնդիրների շուրջ համատեղ հանձնաժողով ձևավորելու հարցում»։
Հիշեցնենք, որ, նույն աղբյուրի հաղորդմամբ, մի քանի օր առաջ Սաակաշվիլին հայտարարել էր. «Վրաստանը պատրաստ է երկխոսություն սկսել Ռուսաստանի հետ, սակայն դա կարող է տեղի ունենալ միայն այն դեպքում, եթե Ռուսաստանը ցանկանա խոսել ժողովրդավարական ճանապարհով ընտրված վրացական իշխանությունների հետ:
2008 թվականի օգոստոսին հաջորդած 3 տարիները վկայում են, որ Վրաստանի դեմ Ռուսաստանի ռազմական միջամտությունը ցույց տվեց ոչ թե նրա հզորությունը, այլ` թուլությունը: Արդեն երեք տարի է, ինչ ես «քաղաքական դիակ» եմ ռուս ղեկավարի համար»: