ԵՄ հարևանության և ընդլայնման հարցերով հանձնակատար Շտեֆան Ֆյուլեն այսօր ելույթ կունենա Ստրասբուրգի Եվրոպական խորհրդարանում: «Ազատություն» ռադիոկայանի աղբյուրների համաձայն` Ֆյուլեն իր ելույթը նվիրելու է Ռուսաստանի կողմից Արևելյան հարևանության ծրագրի ուղղությամբ գործադրվող շարունակական ճնշումներին:
Հանձնակատարն իր ելույթում, ամենայն հավանականությամբ, նշելու է, որ Մաքսային միությունն անհամատեղելի է Խորը և համապարփակ ազատ առևտրի գոտու համաձայնագրերի հետ, որոնք Եվրամիությունը բանակցել է Ուկրաինայի, Մոլդովայի, Վրաստանի և Հայաստանի հետ: Ֆյուլեն, «Ազատություն» ռադիոկայանի ունեցած տեղեկություններով անդրադառնալու է նաև Հայաստանի՝ Մաքսային միությանը միանալու վերաբերյալ հայտարարության և Ռուսաստանի կողմից ԵՄ գործընկերների նկատմամբ ճնշումների խնդրին:
Հանձնակատարը նաև խոսելու է այն մասին, որ Արևելյան գործընկերության երկրները կարող են Մաքսային միության հետ սերտացնել հարաբերությունները որպես դիտորդ երկիր, դա համատեղելի կլինի և չի խանգարի Խորը և համապարփակ ազատ առևտրի գոտուն:
Ֆյուլեն իր խոսքում հավանաբար նաև կխրախուսի գործընկերներին լավ հարաբերություններ ունենալ Ռուսաստանի հետ, բայց Ասոցացման ու Խորը և համապարփակ ազատ առևտրի գոտու համաձայնագրի հետ համատեղելի ձևաչափով:
Հիշեցնեմ` ակնկալվում է, որ հանձնակատարը Երևանում կլինի արդեն ուրբաթ օրը` նախարարների ոչ պաշտոնական հանդիպմանը մասնակցելու: Օրակարգում լինելու է նաև Մաքսային Միության միանալու Հայաստանի որոշումը:
