«Առաջին լրատվական»-ի զրուցակիցն է «Ծառուկյան» դաշինքից ընտրված պատգամավոր, համամասնական ցուցակի 4-րդ համարը զբաղեցրած Վարդան Բոստանջյանը։
-Պարոն Բոստանջյան, ինչպե՞ս կմեկնաբանեք այսօր «Ծառուկյան» դաշինքում տեղի ունեցած իրադարձությունները։ Փաստորեն ,մարդիկ տեղյակ չէին, որ իրենց անունից ինքնաբացարկի դիմումներ են գրվել։
–Այդպես հայտարարվա՞ծ է։
-Այո, 12 թեկնածու այդ մասին հայտարարել է՝ նոր դիմումներ ներկայացրեցին ԿԸՀ և իրենց մանդատները ստացան, նախկին դիմումներն էլ չեղյալ համարվեցին։
-Ես, անկեղծ ասած, չեմ հասցրել այսօր հետևել՝ միջանկյալ քննություններ ունեի։
-Այսինքն՝ չգիտեի՞ք։ Երեկվանից այդ մասին հայտարարում են, որ իրենց անունից դիմումներ են գրվել։
-Բայց ո՞նց կարող է իրենց անունից դիմումներ գրված լինեն, հո այդքան մո՞ւթ չէ այս աշխարհը։ Իրենց անունից ինչպե՞ս կարող է։
-Օրինակ, ասում են, դաշինքում իրենց լիազորագրեր են տվել ստորագրելու, հետագայում պարզվել է՝ դա հենց այդ ինքնաբացարկի դիմումներն են։
–Ի՞նչ ասեմ, ես կարծում եմ՝ դա անհնար է։ Նման դեպքում ակնհայտ ու շուտ բացահայտվող երևույթ կլիներ։ Ո՞նց կարող է պատահել, որ այդպիսի բան լիներ։
-Հիմա փաստացի եղել է, ԿԸՀ-ն էլ իրենց նոր դիմումները բավարարել է ։
-Ես չեմ կարող առարկայական որևէ բան ասել, որովհետև ինքս քննական գործըթնացում եմ, տեղյակ չէի՝ ձեզնից իմացա։
-Բայց դաշինքում նման երևույթ կարո՞ղ էր լիներ․ կարող է, օրինակ, մարդկանց նաև նախապես ասեին՝ պետք է ինքնաբացարկի դիմումներ գրեք։
-Ինձ հետ չի եղել, բա հո չէի՞գնա յուրաքանչյուրին հարցնեի՝ ձեզ հետ ինչ է եղել։ Իմ մասով կարող եմ ասել, որ նման բան չի եղել։ Դրա համար ինչ որ ասում եք՝ ինձ համար զարմանալի է։ Իսկապես տեղյակ չեմ եղել, հիմա արդեն շնչահեղձ սպասում եմ՝ համակարգիչը բացեմ, տեսնեմ՝ ինչեր են գրում։
