«Համագործակցություն հանուն ժողովրդավարության» կենտրոնի ղեկավար Ստեփան Դանիելյանն, այսօր ելույթ ունենալով «Գործընկերություն հանուն բաց հասարակության» թեմայով հանրային քննարկմանը, նշեց, որ հարցը ոչ թե Մաքսային միություն կամ Ռուսաստան գնալն է, այլ այն, թե ինչ քաղաքակրթություն ենք ընտրում մենք։ Նրա խոսքերով՝ ՌԴ-ն գերերկրի ամբիցիաներ ունի, իսկ պատմությունից գիտենք, որ երկիրը գերերկիր դառնալու համար պետք է ունենա արժեքային համակարգ, ինչի ուղղությամբ որոշակի քայլեր արվում են, և դրանք համաշխարհային նշանակություն ունեցող հարցեր են, առաջինը՝ գենդերի, երկրորդը՝ եկեղեցու: «Ռուսաստանը աշխարհաքաղաքական քաղաքականության հիմք է ուզում ստեղծել: Սա քաղաքակրթություն ձևավորելու փորձեր են, և այստեղ կարևորը ոչ թե սկզբունքն է, այլ PR կամպանիան»,- ասաց Ստեփան Դանիելյանը:
Նա նշեց, որ չէր էլ սպասում, որ այս իշխանությունները գնային դեպի Եվրամիություն.«Եթե նույնիսկ նախաստորագրեին Ասոցացման պայմանագիրը, չէին կատարելու պահանջը, քանի որ նրանք ինքնասպաններ չեն»:
Ստեփան Դանիելյանը խոսեց այս դեպքում անհրաժեշտ քայլերի մասին. «Մենք ունենք հաջողված քաղաքացիական հասարակության պայքարի օրինակներ և բազմաթիվ չհաջողվածներ: Եթե փորձենք հասկանալ՝ ինչու հաջողվեց 150 դրամի ակցիան, այն հետևյալն է՝ այդ պահանջը ոչ թե իշխանությանն էր ուղղված, այլ հասարակությանը՝ մի վճարեք, այսինքն այն շարժումները, որոնք ուղղված են հասարակությանը, դրանք հաջողությամբ են ավարտվում: Մենք ինչ-որ հաջողության հասնելու համար մեր հարցը պետք է ուղղենք հասարակությանը, ոչ թե իշխանությանը»։ Ապա բանախոսը հավելեց, որ մենք պետք է ինքնապաշտպանվենք, և երբ պետությունը չի կարողանում կազմակերպել քաղաքացիների անվտանգությունը, հանրությունը ինքնակազմակերպվում է՝ ստեղծում խմբեր:
«Ես այդ փիլիսոփայական գաղափարն եմ առաջ քաշում՝ ոչ թե պահանջել, այլ անել ինքներս։ Նրանք այդ դեպքում տեղի կտան»,- եզարափակեց նա:
