Ինչպես հաղորդում են համաշխարհային լրատվամիջոցները, վերջին շաբաթների ընթացքում կտրուկ սրվել է իրավիճակը Չինաստանի Ներքին Մոնղոլիա նահանգում, որը բնակեցված է էթնիկ մոնղոլներով: Վերջիններս բողոքում են Չինաստանի իշխանությունների և չին մեծամասնության ճնշումների դեմ:
Մայիսի 10-ին մոնղոլ հովիվները փակել էին ծանր մեքենաների ճանապարհը, որոնք պատրաստվում էին հատել նրանց դաշտերը: Այդ ժամանակ մեքենաներից մեկը հարվածել էր հովիվներին` սպանելով Մերղեն անունով մի հովիվի: Մայիսի 15-ին մեկ այլ մոնղոլ սպանվել էր Մերղենի սպանության կապակցությամբ բողոքի ակցիայի ժամանակ:
Չինաստանի իշխանությունները խոստացել են անցկացնել հետաքննություն և արդար վճիռ կայացնել այս հարցի կապակցությամբ:
Տեղեկացնենք, որ Ներքին Մոնղոլիա նահանգում ապրում է 20 միլիոն մարդ, որոնցից 4 միլիոնը մոնղոլներ են: Այն համարվում է Չինաստանի ածուխ արտադրող ամենակարևոր շրջաններից մեկը: Մոնղոլ հովիվները բողոքում են արոտավայրերը կրճատող նոր հանքերի բացման դեմ:
