ԱՄՆ նախագահ Դոնալդ Թրամփը համարում է, որ հյուսիսկորեական ճգնաժամի կապակցությամբ «պետք է պատրաստ լինել վատագույնի»: Այդ մասին նա խոսել է հարցազրույցի ժամանակ, որը հրապարակվել է Washington Examine պարբերականում:
«Հյուսիսային Կորեան ինձ համար ծանր բեռ է, սակայն մենք պետք է պատրաստ լինենք վատագույնի: Մենք պետք է պատրաստ լինենք անելու այն, ինչ պետք է անենք: Մենք չենք կարող թույլ տալ, որ դա շարունակվի»,- նշել է Թրամփը:
Նա հյուսիսկորեական առաջնորդ Կիմ Չեն Ինին նկարագրել է որպես մարդու, ով մշտապես հանդես է գալիս սպառնալիքներով և «ասում է սարսափելի բաներ»: «Մարդիկ չեն կարող դա անել»,- մեկնաբանել է Թրամփը նրա խոսքերը և արարքները:
ԱՄՆ նախագահը ընդգծել է, որ Չինաստանի նախագահ Սի Ցզինպինին խնդրել է օգտագործել իր ազդեցությունը և ճնշում գործադրել Հյուսիսային Կորեայի առաջնորդի վրա, որպեսզի Փխենյանը դադարեցնի միջուկային փորձարկումները և բալիստիկ հրթիռների մշակման ծրագիրը, որոնք կարող են սպառնալ ԱՄՆ-ին:
