International Data Corporation (IDC) ընկերությունը սմարթֆոնների համաշխարհային շուկայի վերաբերյալ հրապարակել է վիճակագրություն ընթացիկ տարվա առաջին եռամսյակի արդյունքներով՝ հայտնում է 3dnews.ru-ը։
Հունվար-մարտ ամիսներին գլոբալ մասշտաբով իրացվել է 347.4 մլն սմարթֆոն։ Դա 4.3 տոկոսով ավելի է 2016 թվականի առաջին եռամսյակի արդյունքների համեմատ, երբ մատակարարումները կազմել են 332.9 մլն միավոր։ Վերջին եռամսյակի տվյալներով՝ խոշորագույն արտադրող է դարձել հարավկորեական հսկա Samsung-ը։ Այդ ընկերությունն իրացրել է 79.2 մլն սարք՝ զբաղեցնելով շուկայի 22.8 տոկոսը։
Երկրորդ տեղում Apple-ն է։ Այս տարվա առաջին 3 ամիսներին ընկերությունն իրացրել է 51.6 մլն iPhone։ Ընկերության մասնաբաժինը համաշխարհային շուկայում կազմում է 14.9 տոկոս։
«Բրոնզը» բաժին է հասել Huawei-ին։ Ընկերությունը կարողացել է եռամսյակի ընթացքում մատակարարել 34.2 մլն սմարթֆոն։ Դա շուկայում հավասարազոր է 9.8 տոկոս մասնաբաժնի։
