Հանրապետության մշակույթի նախարարության և Շիրակի մարզպետարանի աջակցությամբ, «Գյումրին 2013թ. համագործակցության մշակութային մայրաքաղաք» միջպետական ծրագրի միջոցառումների շրջանակներում, «Ավանդական տոների վերածնունդ» կրթամշակութային հասարակական կազմակերպությունը Հայաստանում սեպտեմբերի 7-12-ը անցկացնում է «Հայաստանը խաղաղության խաչմերուկում» երկրորդ միջազգային ֆոլկլորային փառատոնը:
Փառատոնն ուղղված է տարածաշրջանի ճանաչմանն ու զարգացմանը, խաղաղության պահպանմանը, ինչպես նաև մշակութային երկխոսության միջոցով հայ ժողովրդական ավանդական կատարողական արվեստը աշխարհին ճանաչելի դարձնելուն:
Այս տարի միջոցառմանը կմասնակցեն ավանդական երգի-պարի և գործիքային երաժշտության խմբեր ինչպես Հայաստանից, այնպես էլ արտերկրից՝ Չեխիայի «Վալասկե Վայովոդու» ժողովրդական
գործիքների նվագախումբը, Լիտվայի «Ռատիլիո» և Իտալիայի «Սամուգեո» երգի-պարի խմբերը , որոնք ելույթ կունենան Աշտարակում, Ավանում, Գավառում, Ուջանում և Երևանում:
Այսօր Հյուսիսային պողոտայում տեղի ունեցավ փառատոնի գալա-համերգը:
Միջոցառման վերջին օրը Երևանի պետական համալսարանի ուսանողները ուղեկցել են համույթները Հայաստանի տեսարժան վայրեր՝ Էջմիածին, Գառնի, Գեղարդ:
Փառատոնն առաջին անգամ անցկացվել է նախորդ տարի: Այն նպատակ ունի ներկայացնել մասնակից երկրների ֆոլկլորը մեր երկրում, ինչպես նաև օտարերկրյա հյուրերին ներկայացնել հայկական ֆոլկլորը:
