ՀՀ ԱԺ նախագահ Գալուստ Սահակյանն ապրիլի 28-ին ընդունել է Հայաստանի Հանրապետությունում Էկվադորի Հանրապետության արտակարգ եւ լիազոր դեսպան Խուլիո Սեսար Պրադո Էսպինոսային (նստավայրը՝ Մոսկվա): Այս մասին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից:
Ողջունելով նորանշանակ դեսպանին ՀՀ Ազգային ժողովում՝ Գալուստ Սահակյանը շնորհավորել է նրան նշանակման կապակցությամբ եւ մաղթել հաջողություն նախաձեռնությունների իրականացման մեջ:
Կարեւորելով Հայաստանի հարաբերությունները լատինաամերիկյան երկրների հետ՝ ԱԺ նախագահը գոհունակությամբ արձանագրել է Բրազիլիայի, Արգենտինայի, Ուրուգվայի եւ Չիլիի հետ համագործակցության զգալի առաջընթացը:
Անդրադառնալով միջխորհրդարանական հարաբերությունների զարգացմանը՝ Գալուստ Սահակյանը հույս է հայտնել, որ առաջիկայում երկու խորհրդարաններում կձեւավորվեն բարեկամական խմբեր, որոնք կնպաստեն խորհրդարանաների միջեւ ակտիվ համագործակցության հաստատմանը:
Խոսելով Հայաստանի եւ Էկվադորի միջեւ տնտեսական հարաբերությունների մասին՝ ԱԺ նախագահը նշել է. «Պետք է համատեղ ջանքեր գործադրենք այս ոլորտում շոշափելի արդյունքների հասնելու համար: Այս առումով, կարծում եմ, շահավետ կարող են լինել գործարար ֆորումների կազմակերպումը Հայաստանում եւ Էկվադորում:
Խուլիո Սեսար Պրադո Էսպինոսան, շնորհակալություն հայտնելով ընդունելության համար, ՀՀ ԱԺ նախագահին է փոխանցել Էկվադորի նախագահի եւ խորհրդարանի ղեկավարի ողջույնները:
Նորանշանակ դեսպանը նշել է, որ պատրաստ է իր գործունեությամբ նպաստել երկու երկրների հարաբերությունների աշխուժացմանը եւ բազմակողմ համագործակցության զարգացմանը:
Խուլիո Սեսար Պրադո Էսպինոսան նախանշել է հայ-էկվադորյան համագործակցության հիմնական ուղղությունները՝ կարեւորելով թե խորհրդարանականների, թե գործարար հանրության դերը նախաձեռնությունների իրականացման գործում:
Դեսպանը խնդրել է ՀՀ ԱԺ նախագահի աջակցությունը խորհրդարանական դիվանագիտության աշխուժացման եւ բարեկամական խմբերի ստեղծման գործում:
Գալուստ Սահակյանն իր աջակցությունն է հայտնել նախատեսված ծրագրերի իրականացմանը:
Հանդիպման ավարտին դեսպանն անդրադարձել է իր երկրում տիրող ներքաղաքական իրավիճակին:
