«2011 թվականի քաղաքական գարունը էականորեն տարբերվում է մինչ այդ եղած քաղաքական գարուններից: Քաղաքական դաշտում երկխոսություն և հանդուրժողականություն ստեղծելու գործում իրենց ներդրումն ունեն թե՛ խորհրդարանական, թե՛ արտախորհրդարանական ընդդիմությունը և թե՛ իշխանությունները:
Դրանում մեծ ներդրում ունի նաև հանրապետության նախագահը, որը հայտարարել է, թե ինքը պատրաստակամ է անել քայլեր, որոնք միտված կլինեն երկրի ներքաղաքական վիճակի լիցքաթափմանը»,- այսօր հրավիրված ասուլիսի ընթացքում ասաց ՀՀԿ մամուլի խոսնակ, ԱԺ ՀՀԿ խմբակցության պատգամավոր էդուարդ Շարմազանովը: Նա նկատեց, որ Սերժ Սարգսյանի հանձնարարականից ընդամենը մեկ ամիս անց Քրեական օրենսգրքում համապատասխան փոփոխություններ իրականացվեցին և եղավ համաներումը:
Շարմազանովը բացառեց արտահերթ ընտրությունների հավանականությունը՝ ասելով, թե արտահերթ ընտրությունները լինում են այն ժամանակ, երբ երկրում կա ճգնաժամ: Ըստ նրա՝ Հայաստանում ոչ միայն ճգնաժամային իրավիճակ չէ, այլև երկիրը քայլեր է կատարում դեպի ժողովրդավարություն:
Անդրադառնալով համաներման արդյունքում ազատ արձակված քաղբանտարկյաների հնչեցրած գնահատականներին՝ Շարմազանովը ասաց. «Յուրաքանչյուր մարդ ունի իր կարծիքն արտահայտելու իրավունք, բայց այդ կարծիքը չպետք է անցնի էթիկայի սահմաններից: Ինչ վերաբերվում է ներողություն խնդրելուն, ապա ՀՀԿ-ն ոչ թե ներողություն է խնդրում, այլ ներում է»: