Եվրոպական խորհրդարանի նախագահ Եժի Բուզեկը ողջունել է Հայաստանում Սասուն Միքայելյանի ու Նիկոլ Փաշինյանի և Ադրբեջանում Էյնուլլա Ֆաթուլաևի ազատ արձակման մասին լուրերը:
Նա մասնավորապես նշել է, որ ողջունում է Հայաստանի խորհրդարնի և Ադրբեջանի նախագահի` «խղճի կալանավորներին» ազատ արձակելու մասին ընդունած որոշումները: «Սա անկասկած քայլ է ճիշտ ուղղությամբ», ասել է Բուզեկը` հույս հայտնելով, որ երկխոսությունը, խոսքի ազատությունը, ԶԼՄ-ներում բազմակարծության տարածումը և ընդդիմության ու քաղաքացիական հասարակության կառուցողական ներգրավվածությունը հետայսու կամրապնդվի:
Նա մտահոգություն է հայտնել վերջերս Ադրբեջանում ձերբակալված բլոգեր Բախթիյար Հաջիևի կապակցությամբ:
«Իմ վերջին այցելությունը Հարավային Կովկաս մեծ հնարավորություն էր` ուժեղացնելու երկխոսությունը և ես կարողացա հստակ արտահայտել Եվրոպական խորհրդարանի դիրքորոշումը մարդու իրավունքների և ժողովրդավարության խնդիրների վերաբերյալ: Մեր բաց և արդյունավետ մտքերի փոխանակման ժամանակ ես շեշտել եմ, որ մեր հարաբերություններն ունեն հեռանկար` որպես նոր շունչ ստացած «Արևելյան գործընկերության» մի մաս», ասել է նա:
