Գիտնականները հայտնում են, որ ճարպակալումը հանգեցնում է քաղցկեղի 13 տեսակների, այդ թվում՝ ենթաստամոքսային գեղձի և կերակրափողի հիվանդությունների, հայտնում է newsyou.info-ն: Այդ հետևանքները պայմանավորված են օրգանիզմում քաղցկեղային բջիջների աճը ճնշող գործընթացների վրա ճարպային բջիջների ազդեցությամբ:
«Օրգանիզմում ճարպի ավելորդ քանակի պատճառով ճարպային բջիջները վնասակար հորմոններ և պրոտեիններ են արտազատում: Դրանք ընկնում են արյան հոսքի մեջ, շրջանառվում են օրգանիզմում՝ մեծացնելով քաղցկեղի մի քանի տեսակների առաջացման ռիսկը»,- նշում են Միացյալ Թագավորության Կայսերական քոլեջի մասնագետները:
Առողջապահության համաշխարհային կազմակերպության տվյալներով՝ աշխարհում մոտ 1,9 մլրդ հասուն մարդ տառապում է ավելորդ քաշով կամ ճարպակալմամբ, ինչը լուրջ վտանգ է ներկայացնում նրանց կյանքի համար: Ավելորդ քաշի հետ անմիջականորեն կապված քաղցկեղի 13 տեսակների թվում նշվում են՝ կերակրափողի, ենթաստամոքսային գեղձի, լյարդի, ստամոքսի, ուղիղ աղու, լեղապարկի, թոքերի, երիկամների, սեռական օրգանների քաղցկեղը: Կանանց շրջանում կրծքագեղձի, ձվարանների և արգանդի քաղցկեղով հիվանդացության ռիսկ կա:
