«Առաջին լրատվական»-ի տեղեկություններով՝ վաղը առավոտյան ԱԺ է գալու արտգործնախարար Էդվարդ Նալբանդյանը: Նա խորհրդարանականներին պետք է ներկայացնի Հայաստանում վերջին շրջանում ստեղծված իրավիճակը, որը կապված է Սերժ Սարգսյանի անակնկալ հայտարարության հետ, թե Հայաստանը ցանկություն ունի միանալու Մաքսային միությանը:
Հիշեցնենք, որ այսօրվա նիստի սկզբում Եվրաինտեգրման հարցերով մշտական հանձնաժողովի նախագահ Նաիրա Զոհրաբյանը հարց բարձրացրեց, թե երբ են խորհրդարան գալու արտաքին գործերի նախարարության այն ներկայացուցիչները, ովքեր մասնակցել են Մաքսային միության շուրջ տարվող բանակցություններին: Նա նշեց, որ Եվրոպական ինտեգրման հանձնաժողովը դիմել էր՝ խորհրդարան հրավիրելու ԱԳՆ այն ներկայացուցիչներին, ովքեր վարել են բանակցությունները Մաքսային միության փաթեթի շուրջ: Զոհրաբյանը համոզմունք հայտնեց, որ այդ տեղեկատվությունը պետք է տրամադրվեր նման որոշում կայացնելուց առաջ:
Արտաքին հարաբերությունների հարցերով և Եվրաինտեգրման հարցերով մշտական հանձնաժողովների միասնական նիստում վաղը Էդվարդ Նալբանդյանը կանդրադառնա Մաքսային միության և Ասոցացման համաձայնագրի հարցերին:
