Ֆրանսիայում նախընտրական արշավն ավարտվել է։ Այսօր երկրում լռության օր է՝ ապրիլի 23-ն նշանակված նախագահական ընտրությունների առաջին փուլից առաջ։ Այս մասին հայտնում է TASS գործակալությունը։
Այսպիսով՝ 45 մլն ֆրանսիացի ընտրողների տրամադրվում է հնարավորություն՝ հանգիստ միջավայրում նախապատրաստվելու համազգային քվեարկությանը։
Հասարակական կարծիքի վերջին հարցումների համաձայն՝ նախընտրական արշավի ֆավորիտ է հանդիսանում երիտասարդ քաղաքական գործիչ Էմանուել Մակրոնը, ում օգտին առաջին փուլում պատրաստ է իր ձայնը տալ ընտրողների մոտ 23 տոկոսը։ Նա ընտրությունների է գնում որպես անկուսակցական թեկնածու, սակայն նրա օգտին են հանդես գալիս իշխող Սոցիալիստական կուսակցության շատ նախարարներ։ Մակրոնը կարող է իր կողմը գրավել շատ սոցիալիստների՝ այդպիսով ստեղծելով աննախադեպ իրավիճակ Ֆրանսիայի պատմության մեջ։
Մակրոնին գրեթե հավասար ընթանում է «Ազգային ճակատ» կուսակցության առաջնորդ Մարին Լե Պենը, որի օգտին առաջին փուլում իր ձայնը կտա ընտրողների 22 տոկոսը։ Վերլուծաբանների կարծիքով՝ հենց այդ երկու թեկնածուները կարող են դուրս գալ երկրորդ փուլ։ Վերջին հարցումների համաձայն՝ Ֆիյոնի օգտին պատրաստ է քվեակել ֆրանսիացիների առնվազն 20 տոկոսը, Մելանշոնի օգտին՝ 19 տոկոսը։
