Թուրքիայի նախագահ Ռեջեփ Թայիփ Էրդողանի լիազորությունների ընդլայնման հարցով կիրակի կայացած հանրաքվեն նախատեսվածի պես չանցավ՝ հաղորդում է The Wall Street Journal-ը:
Իսլամին հակված բռնապետը հուսադրող աջակցության հույս ուներ, սակայն հաղթել է նվազագույն առավելությամբ, իսկ քվեարկության ժամանակ տեղ գտած խախտումները բիծ են թողնում նրա հաղթանակի վրա: Արդյունքում թուրք հասարակությունն ավելի է բևեռացվել, ինչը կարող է հանգեցնել անկայունության աճի՝ գրում է հոդվածագիրը:
Էրդողանի ճամբարի օգտին քվեարկել է 51.2 տոկոսը, միևնույն ժամանակ խոշոր քաղաները, այդ թվում՝ Անկարան և նույնիսկ Ստամբուլը, որտեղ Էրդողանը եղել է քաղաքապետ, դեմ են քվեարկել հանրաքվեին: «Երկրի ընտրական հանձնաժողովը վերջին պահին որոշում կայացրեց հաշվի առնել առանց պետական կնիքի քվեաթերթիկները: Ժողովրդահանրապետական կուսակցությունը հայտարարեց, որ այդ քայլը և մի շարք այլ խնդիրներ կասկածի տակ են դնում շուրջ 2.5 միլիոն քվեաթերթիկներ»,-ասվում է հոդվածում:
Եվրոպայի խորհրդի և ԵԱՀԿ դիտորդները քննադատել են ընտրական հանձնաժողովի այդ որոշումը: Բացի այդ քաղաքական ակտիվիստներին թույլ չեն տվել միջոցառումներ անցկացնել նախընտրական քարոզարշավի ժամանակ:
