Սյունիքի տարածաշրջանում նոր մաքսատուն կկառուցվի: Մաքսատան համար նախատեսված տարածքում արդեն բացառիկ՝ գերակա հանրային շահ է ճանաչվել: Խոսքը մասնավորապես Շաքի գյուղական համայնքի քաղաքացիների սեփականությունը հանդիսացող 7,13 հեկտար և համայնքի սեփականությունը հանդիսացող 0,56 հեկտար գյուղատնտեսական նշանակության հողերի մասին է:
Սյունիքի մարզի Շաքե համայնքի վարչական տարածքում, 1950-ական թթ. կառուցված մաքսատունը մեկ հարկանի է, և ներկայումս շենքը գտնվում է վթարային վիճակում: Մաքսատան տարածքում գրունտային ջրերի թույլատրելի սահմանից բարձր մակարդակի պատճառով վերոհիշյալ տարածքում կապիտալ շինարարություն իրականացնելը համարվում է ռիսկային: Սիսիանի մաքսատան տեխնիկական վիճակը և տեխնոլոգիական հնարավորությունները չեն բավարարում ժամանակակից պահանջներին:
Այնպես որ, այս տարվա բյուջեով 263մլն 504 հազար դրամ նախատեսված էր Սիսիանի մաքսատան նոր շենք ձեռք բերելու նպատակով: Սակայն, 2013թ. մայիսի 10-ին հայտերի բացակայության պատճառով շենքի ձեռք բերման գործընթացը համարվել է չկայացած: Եվ որպես արդյունավետ լուծման տարբերակ առաջարկվել է կառուցել նոր մաքսատուն Շաքե համայնքի վարչական տարածքում՝ Երևան-Մեղրի միջպետական ճանապարհին հարող հատվածում:
