«Մենք՝ բոլորս, հայ ժողովուրդը, երկիր ծիրանիի տերերն ու զավակներն ենք և այդ պատճառով է, որ այստեղ ընտրեցինք մեր առաջին ասուլիսի վայրը», – «Էրեբունի» թանգարանի դիմաց հանդես գալով բացօթյա ասուլիսով՝ այս մասին ասաց «Երկիր Ծիրանի» կուսակցության նախագահ Զարուհի Փոստանջյանը, նա անդրադարձավ Երևանի ավագանու առաջիկա ընտրություններին և իր կուսակցության ծրագրերին: «Պետության և քաղաքական համակարգի նկատմամբ վստահությունը գալիս է այն ժամանակ, երբ երկրում գործում է օրենք և կոռուպցիայի ցուցանիշը նվազում է»,- ընդգծեց Զ. Փոստանջյանը:
«Երևանի ավագանու ընտրություններում «Ելք»-ի ընտրական ցուցակում ընդգրկված են մարդիկ, ում ես անձնապես ճանաչում եմ, և իհարկե, այդ մարդկանց հետ ես հնարավորություն կունենամ ինչ-որ հարցերի շուրջ համագործակցել, բայց պետք է ասեմ, որ մենք գնում ենք վերցնելու քաղաքապետարանը», – հայտարարեց Փոստանջյանը:
Անդրադառնալով «Ելք» դաշինքի և «Երկիր Ծիրանի» կուսակցության միջև տարբերություններին՝ Փոստանջյանն ասաց, որ դրանք մեծ են: « «Ելք»-ը «սպոնտան» ձևավորված մի միավորում է, որը դեռ պետք է հղկվի: Ես չգիտեմ՝ նրանք կդառնա՞ն մեկ քաղաքական ուժ: Այնտեղ ներգրավված են տարբեր քաղաքական ուժերի ներկայացուցիչներ՝ տարբեր մոտեցումներով, և հետևաբար միասնական չեն», -հայտարարեց Փոստանջյանը:
Մանրամասները՝ տեսանյութում:
