«ՍԱՍ գրուպ»‑ի աշխատակիցների հետ հանդիպման հայտնի ձայնագրությունից հետո համացանցում հայտնվել է Չարենցավանի քաղաքապետ Հակոբ Շահգալդյանի նախընտրական քարոզարշավի ժամանակ չարենցավանցիների հետ զրույցը, որտեղ նա համոզում է ընտրել ՀՀԿ-ին։ «Մեր քաղաքի ձեռնտու տարբերակը ՀՀԿ-ն է, գալիս են՝ սաղ քաղաքին գործ են խոսք տվել, որտեղ են տեղավորելու, ամսի յոթից հետո էլ իրենց չեք տենալու: Էլի մենք ենք իրար երես տեսնելու, խաթրի համար են ընտրում, որովհետև ես ձեզ չեմ խաբում, ինձ պետք ա, որ էս քաղաքը լավ լինի»,- ասվում է ձայնագրության մեջ:
Հակոբ Շահգալդյանը, ով Կոտայքի նախկին մարզպետ Կովալենկո Շահգալդյանի որդին է, «Առաջին լրատվական»-ի հետ զրույցում, անդրադառնալով ձայնագրությանը, նշեց, որ այն ունի հինգ տարվա վաղեմություն: Իսկ թե ինչու է հինգ տարի հետո ձայնագրությունը հայտնվել համացանցում, Չարենցավանի քաղաքապետն ասաց. «Չգիտեմ, թե ինչու է այդտեղ հայտնվել, և այդտեղ որևէ օրենքի խախտում չկա, որովհետև ես ինքս ուղղակի գնացել եմ շենքերի առաջ ոչ աշխատանքային ժամերին քարոզչություն եմ արել։ Ժողովուրդը հավաքվել, զրուցել է հետս, գաղտնի որևէ բան չեմ արել: Ես ժողովրդի հետ ընտրարշավ եմ արել՝ որպես շտաբի պետ: Ո՞ւմ եմ նվաստացրել և կամ ո՞ւմ եմ վատ բան արել, երբ ասել եմ ընտրեք ՀՀԿ-ին»։
Թե ինչու այս ձայնագրության տարածումը համընկավ «ՍԱՍ գրուպ»‑ի աշխատակիցների ձայնագրության հետ, որ մեծ աղմուկ բարձրացրեց համացանցում, Հակոբ Շահգալդյանը ասաց. «Մարդ կա, որ ինչ-որ ինտրիգ է փնտրում, փորձում սկանդալ դարձնել, բայց, համենայնդեպս, իմ պահով չի հաջողվի, քանի որ դա այդ տարբերակը չէ: Ինչ-որ մի ձայնագրություն են պահել և դրանով փորձում են մարդուն վարկաբեկել»:
Նրա կարծիքով՝ ինքը զուսպ քարոզարշավ է իրականացրել օրենքի տառին համապատասխան: Ի դեպ, Հակոբ Շահգալդյանը արդեն քաղաքապետի 3-րդ շրջանն է պաշտոնավարում։ «Եկեք, Չարենցավանի ժողովրդից հարցրեք, ընդունո՞ւմ են ինձ, թե՞ ոչ»,- հավելեց նա։
Հակոբ Շահգալդյանն իր ձայնագրությունը լսել էր, բայց «ՍԱՍ գրուպ»‑ի աշխատակիցների ձայնագրությունը չի հասցրել լսել. «Ճիշտն ասած, ես այդ ձայնագրությունը չեմ էլ լսել, բայց, համենայնդեպս, ես ուղղակի չեմ հասկանում՝ ի՞նչն է պատճառը, մարդիկ ի՞նչ են ման գալիս, սա է խնդիրը: Ինքս այդ ձայնագրությունը չեմ լսել, և հիմա ստիպված պետք է լսեմ, որ ձեր հարցերին պատասխանեմ, բայց ես այդպիսի բաների ուշադրություն չեմ դարձնում, իսկ եթե ինձ հետ կապված չլիներ այն ձայնագրությունը, չէի լսի»: Ամեն դեպքում, Չարենցավանի քաղաքապետը նշեց, որ մարդկանց վարկաբեկելով, ստորացնելով ձայներ ստանալը՝ իր համար անընդունելի է:
