Շվեդիայի և Լեհաստանի արտաքին քաղաքական գերատեսչությունների ղեկավարները Արևմուտքի երկրներին փորձել են զերծ պահել Սիրիայի ճգնաժամի հարցում «չկանխամտածված քայլերից»՝ պնդելով, որ Սիրիայի հակամարտության լուծման համար տասնամյակներ կպահանջվեն: Նման հայտարարությամբ հանդես են եկել Շվեդիայի արտաքին գործերի նախարար Կարլ Բիլդը և նրա լեհ գործընկեր Ռադոսլավ Սիկորսկին՝ Լիտվայի մայրաքաղաքում ելույթ ունենալով ՆԱՏՕ-ի տարածաշրջանային համաժողովի ժամանակ:
Նրանց կարծիքով՝ Սիրիայի դեմ ռազմական գործողությունների կոչ անող Արևմուտքի երկրները անհեռատեսություն են ցուցաբերում:
«Միակ միջոցը, որը կարող է հաջողության քիչ թե շատ շանսեր ունենալ, Սիրիա ցամաքային զորքեր ուղարկելն է, այնտեղ նրանց 30 տարով տեղակայելը և սիրիացի ժողովրդին օգնություն տրամադրելը՝ վերականգնվելու համար: Որևէ մեկն ունի՞ դա անելու ցանկություն: Իհարկե, ո՛չ»,- ասել է Բիլդը:
Լեհ նախարարն էլ իր հերթին դիմել է միջոցառմանը ներկա փորձագետներին՝ խորհուրդ տալով «հակամարտությունը խորացնելուց առաջ հետևանքների մասին մտածել»:
Այս մասին հաղորդում է Ria Novosti-ն:
