Եվրամիությունը վերջին շրջանում բարձրաստիճան պաշտոնյաների մակարդակով խոսում է ԼՂ հարցի կարգավորման վերաբերյալ: Օրերս էլ «Նոր պատասխան փոփոխվող հարևանությանը» Եվրահանձնաժողովի ընդունած փաստաթղթում նշված է, որ Եվրամիությունը պատրաստ է քայլեր ձեռնարկել՝ ընդլայնելու իր ներգրավվածությունն այն ձևաչափերում, ուր դեռ ներկայացված չէ, օրինակ՝ ԵԱՀԿ Մինսկի խմբում:
Նկատենք, որ մինչ այդ ՄԽ-ում ԵՄ-ն ներկայանում էր ի դեմս մեկ պետության՝ Ֆրանսիայի, իսկ այս հայտարարությունը ցույց է տալիս, որ ԵՄ-ն նպատակ ունի փոխելու այս ֆորմատը:
Երևանի պետական համալսարանի քաղաքականության և մշակութային ուսումնասիրությունների կենտրոնի տնօրեն, քաղաքական վերլուծաբան Դավիթ Հովհաննիսյանի գնահատմամբ, դա ընդամենը ինչ-որ հնարավոր տարբերակի քննարկում է. «Բայց Մինսկի խմբին այսօր այլընտրանք չկա, դա միակ ֆորմատն է, որով այս չափազանց լարված իրավիճակում հնարավոր է տանել բանակցություններ, այնպես որ՝ չեմ կարծում, որ ԵՄ-ն առաջ տանի իր այդ նախաձեռնությունը»:
Ըստ Հովհաննիսյանի՝ Եվրամիությունն այսօր բազմաթիվ այլ գլխացավանքներ ունի և դժվար թե այժմ ներգրավվի նաև ԼՂ բանակցային գործընթացի մեջ:
