Հայաստանում ԵՄ պատվիրակության ղեկավար, արտակարգ և լիազոր դեսպան Պյոտր Սվիտալսկին «Առաջին լրատվական»-ին տված բացառիկ հարցազրույցում խոսելով Հայաստանում կոռուպցիայի դեմ պայքարի մասին՝ նշել էր, որ շարունակելու են կոռուպցիայի դեմ պայքարի ուղղությամբ աշխատել ՀՀ կառավարության և անկախ հակակոռուպցիոն մարմնի ստեղծման շրջանակներում: «Մենք ակնկալում ենք, որ կյանքի կկոչվեն ՀՀ վարչապետի կողմից ինձ և հատկապես հայ ժողովրդին տրված խոստումները, այդ թվում՝ անկախ հակակոռուպցիոն մարմնի ստեղծման վերաբերյալ: Այո, մենք շարունակելու ենք աշխատել ՀՀ կառավարության հետ կոռուպցիայի դեմ պայքարի ուղղությամբ և, հավատացած լինելով, որ ընտրություններից առաջ մշակված նախագծերը հեռանկարային են, հուսով ենք, որ այժմ առկա է դրանք կյանքի կոչելու համար հավելյալ շարժառիթ։ Եվ կա նաև լրացուցիչ հանձնարարություն, այն է՝ վերացնել քվեների վաճառքն ու ընտրական և քաղաքական կոռուպցիան, որն, ըստ ամենայնի, հավատացած եմ՝ լուրջ սպառնալիք է ոչ միայն քաղաքական մշակույթի զարգացման, այլև Հայաստանի ապագայի համար՝ ներառյալ Հայաստանի արժանապատվությունը»,- ասել է Սվիտալսկին:
Նշենք, սակայն, որ այս պահի դրությամբ Հայաստանում չկա անկախ հակակոռուպցիոն մարմին: Հակակոռուպցիոն մարմին կա, սակայն կառավարությանը կից, որը «Թրանսփարենսի ինթերնեյշնլ» հակակոռուպցիոն կենտրոնի տնօրեն Վարուժան Հոկտանյանի խոսքով՝ անկախ անվանել չի կարելի: «Մարմինը, կառույցը, որը կառավարությանը կից է, որի ղեկավարները կառավարության անդամներն են, չի կարող անկախ համարվել: Ես դժվարանում եմ ասել, թե ԵՄ դեսպանը ինչ կառույց է նկատի ունեցել: Այս պահին նմանատիպ կառույց չկա»,- «Առաջին լրատվական»-ի հետ զրույցում ասաց Հոկտանյանը:
Նրա խոսքով, սակայն, կա մեկ այլ՝ դեռևս կյանքի չկոչված մարմին: Ընտրություններից առաջ կառավարությունը քննարկում էր էթիկայի հանձնաժողովի հիմքի վրա ստեղծել հակակոռուպցիոն անկախ, կանխարգելիչ մարմին: «Այ, սա եթե իրապես ստեղծվի, կարող է լինել անկախ մարմին, սակայն ապրիլի 27-ին կառավարությունը հրաժարական է տալու, դրանից հետո ԱԺ նիստ է գումարվելու, և օրենքների քննարկումը կլինի միայն աշնանը: Այդ նախագիծը հավանաբար այդ ժամանակ նոր կդրվի քննարկման: Իսկ եթե Սվիտալսկին նկատի ուներ արդեն գործող կառավարությանը կից հակակոռուպցիոն խորհուրդը դարձնել անկախ, ապա դա աբսուրդ է»,- ասաց Հոկտանյանը:
Մեր զրուցակիցը նշեց, որ երկու դեպքում էլ ինքն առանձնապես ոգևորված չէ, քանի որ կոռուպցիայի դեմ պայքարի համար քաղաքական կամք է անհրաժեշտ, եթե այդ կամքը լինի, կապ չունի՝ դրա համար հակակոռուպցիոն խորհուրդ, անկախ մարմին կամ նմանատիպ այլ կառույց կա՞, թե՞ ոչ: «Եթե քաղաքական կամք չկա, ոչ մի մարմին էլ արդյունավետ չի գործի: Իսկ եթե քաղաքական կամք կա, ապա ավելի շատ մասնագիտական անկախ մարմնի անհրաժեշտություն կա: Դա ավելի շատ օգուտ կտա, իսկ եթե կամք չկա, ապա այսպես կառավարությունները կփոխվեն, վարչապետները կփոխվեն, և սեղանին կմնա միայն հակակոռուպցիոն ռազմավարությունը՝ թղթի վրա»,- եզրափակեց Հոկտանյանը:
