WikiLeaks-ի հիմնադիր Ջուլիան Ասանժի մասին պատմող «Հինգերորդ իշխանություն» ֆիլմում գլխավոր հերոսին մարմնավորած բրիտանացի դերասան Բենեդիկտ Կամբերբետչը, որը հայտնի է «Շերլոկ» սերիալով, հանդես է եկել ի պաշտպանություն Ասանժի:
«Ես կարծում եմ, որ մեզ հաջողվել է ցուցադրել նրա գաղափարները, նվիրվածությունն ու ինքնազոհաբերությունը: Կարծում եմ՝ նրա ձեռքբերումները բավական զգալի են»,- ասել է Կամբերբետչը այն բանից հետո, երբ «Հինգերորդ իշխանությունը» բացել է Տորոնտոյի 38-րդ կինոփառատոնը:
«Կարծում եմ՝ ճիշտ չէր լինի նրան պատկերել միայն լուսավոր կամ մռայլ գույներով: Հանդիսատեսը ցանկանում է իմանալ նրա մարդկային կողմերը: Դա բացարձակ չի նշանակում, որ մենք պետք է հարթեցնենք սուր կողմերը»,- ասել է դերասանը:
«Ես իրավապաշտպան չեմ, սակայն կցանկանայի, որ այդ մարդը այսուհետ ևս շարունակեր աշխատել WikiLeaks-ի ղեկավարի դերում: Նրա նկատմամբ դատավճիռը պետք է արդար լինի»,- Կամբերբետչի խոսքերը մեջբերում է The Guardian-ը:
Դերասանը նաև ասել է, որ անձամբ Ասանժին ֆիլմն ամենայն հավանականությամբ դուր չի գա: