Грузия Online-ի փոխանցմամբ, Միջազգային հանրապետական ինստիտուտը (IRI) մայիսի սկզբին տարբեր խնդիրների շուրջ հետազոտություն է անցկացրել Վրաստանում, որին մասնակցել է ավելի քան 1500 մարդ։
Քաղաքական գործիչների թվում ամենաբարձր գնահատականը ստացել է նախագահ Միխեիլ Սաակաշվիլին՝ 78 տոկոս։ Նշվում է, որ այդպիսի վարկանիշ Սաակաշվիլին երբեք չի ունեցել։
«Եթե հաջորդ շաբաթ ընտրություններ լինեին, ո՞ր կուսակցության օգտին կքվեարկեիք» հարցին, մասնակիցների 42 տոկոսը նշել է Սաակաշվիլիի հիմնադրած «Միացյալ ազգային շարժում» կուսակցությունը, 14 տոկոսը՝ «Քրիստոնեա-դեմոկրատական շարժումը», 4 տոկոսը «Լեյբորիստական» կուսակցությունը, իսկ 2 տոկոսը՝ «Ազգային ֆորումը»։
Ընդ որում, 6 կուսակցություններ ոչ մի քվե չեն ստացել, որոնք են գլխավոր ընդդիմադիր կուսակցությունները` «Դեմոկրատական շարժում և Միացյալ Վրաստան» և «Վրացական», ինչպես նաև «Ազատ դեմոկրատներ», «Ժողովրդա-դեմոկրատական», «Նոր աջեր» և «Հանրապետական» կուսակցությունները։
Այլ երկրների հանդեպ տրամադրվածության հարցում հարցախույզի մասնակիցների 94 տոկոսը դրական վերաբերմունք ունի ԱՄՆ նկատմամբ, իսկ 93 տոկոսը բացասաբար է արտահայտվել Ռուսաստանի նկատմամբ։ Վերջինիս Վրաստանի անվտանգության գլխավոր սպառնալիք է դիտարկում 83 տոկոսը, 72 տոկոսն էլ կարծում է, որ Վրաստանի նկատմամբ Ռուսաստանի ագրեսիան շարունակվում է։ 77 տոկոսն աջակցում է ՆԱՏՕ-ին Վրաստանի անդամակցությանը։
62 տոկոսը դրական է գնահատել Սաակաշվիլիի ու կառավարության՝ ֆինանսական ճգնաժամի հաղթահարմանն ուղղված քայլերը, իսկ 8 տոկոսը բացասական է որակել դրանք։ 97 տոկոսը նշել է, որ վերջին մեկ տարվա ընթացքում իրենք ստիպված չեն եղել կաշառք վճարել այս կամ այն ծառայության համար։