Ամերիկացի գիտնականները փորձարկել են կպչուն վիրակապ, որը թույլատրում է վերացնել հետվիրահատական սպիերը: Այս մասին գրում է New Scientist-ը՝ հղում կատարելով Annals of Surgery ամսագրում հրապարակված հոդվածին:
Վիրակապը ստեղծելիս օգտագործվել է սիլիկոնային պոլիմեր, որը թույլ է տալիս փոքրացնել մեխանիկական ազդեցության դեպքում դրա վրա առաջացող լարվածությունը: Բացի այդ, այս վիրակապի տեխնոլոգիան գործածում է հատուկ քսուքներով պատված տեֆլոնային թերթիկներ:
Կպչունության շնորհիվ այս վիրակապը միացնում և ձիգ է պահում մարմնի մաշկի վնասվածքի վերքի ծայրերը՝ թույլ չտալով դրանց ձևախախտում:
Բժիշկներն առաջին փորձերը կատարել են խոզերի վրա, որոնց վնասվածքների մի մասը ֆիքսվել է սովորական կպչուն վիրակապով, իսկ մյուսը՝ նոր ստեղծվածով: 8 շաբաթ հետո պարզվել է, որ սովորական վիրակապի դեպքում մնացած սպիերի չափսերը վեց անգամ գերազանցել են նոր կպչուն վիրակապով առողջացածների չափսերը:
Այնուհետև դա փորձարկվել է մարդկանց վրա, ինչից հետո այն հաստատվել է որպես չափազանց արդյունավետ միջոց:
