Հայաստանի քաղաքագետների միության նախագահ Հմայակ Հովհաննիսյանը այսօր մեզ հետ զրույցում ահազանգեց, որ թեև վտանգներ կան, որ ընդդիմությունը այս երկխոսության արդյունքում կհեղինակազրկվի, բայց իրեն ոգևորել է բանտից դուրս գալուց Նիկոլ Փաշինյանի այն գնահատականը, որ իրեն կարող են շնորհավորել այն ժամանակ, երբ Սերժ Սարգսյանը հրաժարական տա:
«Դա շատ ճիշտ գնահատական է: Թե չէ՝ երկխոսելու համար ի՞նչ պատվիրակություն պետք է կազմի ընդդիմությունը, երբ իշխանությունը մերժում է նրա ներկայացրած օրակարգը: Սկզբում ճշտեք` արդյո՞ք կա հնարավորություն, որ այդ օրակարգի հետ իշխանությունը կհամաձայնի թեկուզ մասամբ: Եթե պատվիրակություն կազմեն, կոնկրետ ես երես կթեքեմ Կոնգրեսից: Այն պարզ պատճառով, որ եթե այդ օրակարգով երկխոսություն սկսի, ապա ընդդիմությունը կլեգիտիմացնի ոչ լեգիտիմ իշխանությանը»,- ավելացրեց Հմայակ Հովհաննիսյանը: