Բուդաղյան եղբայրների հայրը հարցեր է բարձրացնում և սպասում

Հունիսի 1-ին Գորիսում Սյունիքի նախկին մարզպետ Սուրեն Խաչատրյանի տան մոտ պատահած դեպքերի առնչությամբ ներկայացվում են ամենատարբեր «իրականություններ»: Հունիսմեկյան իրադարձություններից ամիսներ անց գործի բացահայտմանն ուղղված քայլերի, արդարադատությունից սպասելիքների շուրջ «Առաջին լրատվական»-ը զրուցել է Արտակ և Ավետիք Բուդաղյանների հոր՝ Էմիլ Բուդաղյանի հետ:

– Պարոն Բուդաղյան, Դուք օրեր առաջ բաց նամակ էիք հղել հանրապետության նախագահին, որևէ արձագանք ստացե՞լ եք:

– Առայժմ արձագանք չեմ ստացել:

– Դեռ սպասո՞ւմ եք պատասխանի:

– Այո: Ինձ փաստաբանն ասաց, որ պետք է տասնհինգ օրվա  ընթացքում պատասխանեն:

– Եթե, այնուամենայնիվ, պատասխան չլինի, ինչպե՞ս եք վարվելու:

– Երկրորդ նամակը կուղարկեմ , հետո անձամբ խնդրեմ, որ ինձ ընդունեն:

– Նախագահի՞ մոտ:

– Այո:

– Ուզում եմ Ձեր որդու առողջական վիճակով հետաքրքրվել, ինչպե՞ս է Արտակ Բուդաղյանը:

– Նորմալ, աշխատում է:

– Լրիվ կազդուրվե՞լ է, առողջական խնդիրներ չունի՞:

– Առողջական վիճակը. . .   դեռ վերքը չի ներծծվել: Նրա լրիվ առողջացումը կախված է հետագա ֆիզիկական վիճակից: Նա դեռ հսկողության տակ պիտի մնա այնքան, մինչև առողջանա, թե չէ  պիտի նորից վիրահատեն:

– Հույս ունե՞ք, որ արդար որոշում կլինի հունիսմեկյան գործով:

– Դե, դեռ սպասողական վիճակում ենք: Ընթացքը ցույց կտա: Սպասելով ապրում ենք, էլի, տեսնենք՝ ինչ է դառնում:

– Հետևո՞ւմ եք լրատվամիջոցներին:

 – Այո:

– Շրջանառվում են հունիսմեկյան դեպքերն արձանագրած տեսանյութեր, դրանք իրակա՞ն են Ձեր կարծիքով:

– Ինձ օրիգինալը ցույց են տվել իրենք՝ քննիչները:

– Ասում են՝ շրջանառվող տեսանյութը մոնտաժված է:

– Մոնտաժվածն այն մեկն էր, որ տարածվել էր սկզբում: Օրիգինալը մոնտաժված չէ, այնտեղ շատ հարցեր կան, որոնց պատասխանները պետք է տան իրենք՝ քննիչները և ստուգող մարմինները:

– Ձեր որդուն ուզում են պատասխանատվության ենթարկել, հիմքեր կա՞ն:

– Դե, իրենց մտածելակերպով` իբր հավասարակշռությունը պահելու համար:

– Այդ քայլը հատուկ նպատակ ունի՞:

– Այո, իրողությունը թաքցնելու:

– Ձեզ կրկնակի հարցաքննության էին հրավիրել. . .

– Այո, կանչել են և հարցաքննել: Ես էլ ասել եմ, որ կետեր կան, որոնց պատասխանը պիտի տան, միևնույն ժամանակ այսինչ կետերի համաձայն պիտի պատասխանատվության ենթարկեն Սուրիկ Խաչատրյանին: Ըստ օրենքի`  նրան երեք կետից մեղադրանք պետք է ներկայացվի առանց որևէ հարցերի, բայց չի ներկայացվել, դրա համար էլ նամակը գրել եմ:

– Այս գործի բացահայտման հարցում Ձեր հույսերն ավելի շատ երկրի ղեկավարի՞, թե՞ արդարադատության հետ եք կապում:

– Հենց պետության ղեկավարի հետ եմ հույսեր կապում, նա պիտի ընտրի հետագա քայլերը:

– Ասում են` Ձեր որդու արյան մեջ ալկոհոլ են հայտնաբերել:

– Մի պրոմիլ, քանի որ այդքան դեղեր է ընդունել, դեղերն էլ սպիրտային են, չէ՞: Հայտնաբերել են վեցերորդ օրը, երբ ընդհանրապես իրավունք չունեին դա ստուգել: Ինչ չափով որ իրենք ասում են, դեղ ընդունած յուրաքանչյուր մարդու մոտ այդքան կլինի:

– Հայտնի դեպքերի օրը Արտակ Բուդաղյանն ալկոհոլ չի՞ օգտագործել:

– Բացարձակապես, երեխաներին տարել է կարուսել- բան, նոր այդ պրոցեսները կատարվել են:

– Ձեր որդին առերեսումներին մասնակցո՞ւմ է:

– Առերեսումներ կատարվել են, գնացել է, հիմա էլ ասում են՝ չէ, առերեսում չենք անում, ձեզ կանչում ենք նյութերին ծանոթանալու . . .