«Առաջին լրատվական»-ի զրուցակիցն է «Միասնություն» շարժման համակարգող խորհրդի ղեկավար Արման Վարդանյանը։
-Պարոն Վարդանյան, խորհրդարանական ընտրություններից առաջ նշվում էր, որ ավագանու ընտրություններին հնարավոր է` «Ծառուկյան» դաշինքի ավագանու համամասնական ցուցակը Դուք գլխավորեք։ Վերջնական որոշում կա՞ արդեն։
–Այս պահին քննարկումներ են գնում, մի քանի օրվա ընթացքում պարզ կլինի՝ կհայտնենք։
-Բայց Դուք ունե՞ք այդպիսի ցանկություն։
-Մենք թիմային աշխատանք ենք տանում, քննարկումներ են գնում։ Երբ վերջնական որոշենք՝ տեղյակ կպահենք։
-Քննարկումներ եք տանում «Միասնություն» շարժման ներսո՞ւմ, թե՞ Ծառուկյանի հետ։
–Անձամբ Ծառուկյանի և «Ծառուկյան» դաշինքի հետ քննարկումներ են գնում ձևաչափի և հետագա քայլերի վերաբերյալ։ Երբ կոնկրետ գործողությունների քարտեզն ունենանք, ես կամ որևէ մեկը տեղյակ կպահենք, կհրապարակենք այն ամենը ինչի շուրջ պայմանավորվել ենք։
-«Միասնություն» շարժմանը բավարարո՞ւմ է խորհրդարանական ընտրությունների արդյունքները, թե՞ ավելին էիք ակնկալում։
-Մեր ռեյտինգային թեկնածուները բավականին մեծ քանակությամբ ձայներ են հավաքել։ Այդ իմաստով մեր քայլերը համարում եմ բավարար և դրական։ Ընդհանուր առմամբ, մենք այս պահին ունենք ձևավորված խորհրդարան և այդ խորհրդարանի աշխատանքից է կախված, թե ով գոհ կմնա։ Ամենակարևորը, որ ժողովուրդը գոհ մնա, ոչ թե այս կամ այն անհատը, որովհետև խորհրդարանը ձևավորվել է ժողովրդին ծառայելու համար։ Ամենակարևորն այն է, որ ժամանակի ընթացքում տեսնենք ժողովրդի գոհունակությունը։ «Ծառուկյան» դաշինքի մասով վստահ եմ՝ ժողովուրդը գոհ կլինի դաշինքի աշխատանքից։
