«Առաջին լրատվական»- ի զրուցակիցն է ԳԽ պատգամավոր Օհանյան-Րաֆֆի-Օսկանյան դաշինքի համախոհ Ազատ Արշակյանը:
–Պարոն Արշակյան, արդեն շատ ուժեր, այդ թվում նաև Օհանյան-Րաֆֆի-Օսկանյան դաշինքը հայտարարել են, որ երկրում չկան հանրային գործողությունների, փողոցային պայքարի հասարակական տրամադրություններ, մինչդեռ դուք նախընտրական քարոզարշավի ընթացքում ընդհուպ մինչև սպառնում էիք, որ կլինի արյունահեղություն և այլն, եթե չլինեն համապատասխան արդյունքներ, և այդ արդյունքները չբավարարեն ձեզ: Այսօր Օհանյան-Րաֆֆի-Օսկանյան դաշինքի կողմից տարբեր տեսակետներ են հնչում, մի մասը ճանաչում է ընտրությունների արդյունքները, մի մասը չի ճանաչում: Ընդհանուր առմամբ ինչպե՞ս կգնահատեք ստեղծված իրավիճակը և ի՞նչ կասեք ձեր անելիքների մասին:
-Նախ՝ արյունահեղության մասին. մենք ասել ենք՝ մենք դառնալու ենք զոհը, ոչ թե մենք ենք հրահրելու արյունահեղություն, այլ մեր արյունը կթափվի. դրա մասին է եղել խոսքը, հենց սկզբից էլ մենք հայտարարել ենք, որ չկա քաղաքական արժեք, որի համար իմաստ կունենա քաղաքացիական խժդժություններ հրահրել:
-Սամվել Բաբայանն այդպես չէր ասում:
-Ես հենց Սամվել Բաբայանի խոսքն եմ հիմա բացում, նա ասում էր՝ սրանք դա կանեն, մենք չենք անելու, մեր արյունն են հեղելու, և ես կարծում եմ Սամվել Բաբայանը դա ասելու համար հիմքեր ուներ. մեզ վրա կրակել էին, դանակահարել էին…
-Փաստորեն դուք զոհն էիք: Այդ դեպքում ինչո՞ւ հասարակությունը մերժեց ձեզ, ընդհանրապես հասարակությունը զոհերի նկատմամբ ավելի մեծ համակրանք է ունենում:
-Այո՛: Այստեղ ուրիշ բանաձև է աշխատում, հասարակությունը հասկացավ, որ մեզ հետ լինելը վտանգավոր է, մենք՝ ինքներս վտանգ ենք ներկայացնում իշխանության համար… հետաքրքիր է, թվում է, թե մենք խաղաղասեր ենք, օրինակ՝ ես՝ ինքս, միշտ դեմ եմ եղել քաղաքացիական բարիկադներին, բայց հասարակությունը մեր մեջ վտանգ տեսավ, հասկացավ, որ մեր ակտիվիստների հետ եթե խիստ են վարվում, հետևաբար նաև ընտրողների հետ խիստ կվարվեն: Կարծում եմ դա էր պատճառը, որ չաշխատեց համակրանքը, կարեկցանքը: Դա մի պահ թափ առավ, բայց հետո հասկանալի դարձավ, որ իշխանափոխություն չի լինելու, մենք գնում էինք իշխանափոխության, հասարակությունը, մեր պոտենցիալ ընտրողները հասկացան, որ իշխանությունը ամեն գնով վերարտադրվելու է:
-Բայց տեղի ունեցավ ընդդիմափոխություն:
-Շատ գեղեցիկ բան ստացվեց, ընդդիմափոխություն եղավ, և ես հենց որպես ընդդիմություն եմ ընկալում «Ելք»-ին, որպես իշխանություն, ես կարծում եմ, որ վաղ է, նրանք փորձ չունեն, նույնիսկ Արամ Սարգսյանը, որ մի քանի ամիս եղել է վարչապետ: Որպես ընդդիմություն ես «Ելք»-ին համակրում եմ:
Հարցազրույցն ամբողջությամբ՝ տեսանյութում:
