Ռուսաստանի և Եվրամիության համար կարևոր Հայաստանը, Մոլդովան և Ուկրաինան պետք է որոշեն իրենց սեփական ուղին: Ինչպես հաղորդում է REGNUM-ը, այս մասին հայտարարել է Եվրոպական խորհրդի ղեկավար Հերման Վան Ռոմպեյը՝ դասախոսություն կարդալով Սանկտ Պետերբուրգում:
«Մենք կիսում ենք ընդհանուր սահմաններ, ինչպես նաև ընդհանուր հարևաններ: Ուկրաինան, Հայաստանը և Մոլդովան, որոնք նշանակություն ունեն մեզ համար, պետք է որոշեն իրենց սեփական ուղին: Սակայն, մեր կարծիքով՝ Ուկրաինայի համար Եվրամիության հետ Ասոցացման համաձայնագիրը չի վնասի Ռուսաստանի հետ նրա հին կապերին: Ինչո՞ւ դա պետք է լինի «կամ-կամ»-ի հարց»,- ասել է նա:
Այնուհետև Ռոմպեյն ընդգծել է, որ եվրոպական մայրցամաքում կայուն անվտանգություն չի կարող ձեռք բերվել, եթե Ռուսաստանը և Եվրամիությունը չաշխատեն սերտ փոխգործակցությամբ:
«Մենք արդեն շատ բան ենք արել «սառը պատերազմի» ավարտից հետո և կարող ենք հպարտանալ դրանով: Միասին պետք է ավելի շատ բան անենք և փորձենք լուծել, այսպես կոչված, «ձգձգված» հակամարտությունները, որոնք շարունակում են մնալ մեր ընդհանուր հարևանների մոտ, ինչպիսին է մերձդնեստրյան հակամարտությունը Մոլդովայում»,- հայտարարել է նա:
Հատկանշական է, որ Հերման Վան Ռոմպեյը չի հիշատակել Վրաստանին և Ադրբեջանին այն երկրների շարքում, որոնք ինտեգրվում են ԵՄ-ի հետ «Արևելյան գործընկերություն» ծրագրի շրջանակներում:
