Անվտանգության առումով ԵՄ-ն Հայաստանին այլընտրանք չի առաջարկում: Այս մասին այսօր լրագրողների հետ հանդիպման ժամանակ ասաց «Քաղաքական և միջազգային հետազոտությունների կենտրոնի» փորձագետ, քաղաքագետ Ռուբեն Մեհրաբյանը՝ խոսելով Մաքսային միությանը միանալու ՀՀ որոշման մասին:
Նա նշեց, որ բացի ներքաղաքական գործոններից՝ այս որոշման մեջ կա նաև ՀՀ-ից դուրս գտնվող կոնտեքստ՝ ՌԴ-Արևմուտք հարաբերությունները, Արևմուտքի քաղաքական ռազմավարության թուլությունը, ինչը մենք տեսնում ենք նաև Սիրիայի պարագայում, որտեղ բացակայում է քաղաքականությունը:
Պրոյեկցելով հետխորհրդային տարածքի վրա՝ փորձագետը նշեց, որ նույն խայտառակությունն էլ այստեղ է. չկա ռազմավարություն, էպիզոդիկ, լավագույն դեպքում՝ մարտավարական քայլեր են, ավելին՝ Արևմուտքն առաջնորդվում է Պուտինին չնեղացնելու քաղաքականությամբ, և ոչ պաշտոնական շրջանակների կողմից Հայաստանին ուղղված կշտամբանքն էլ պարզապես հարց է առաջացնում. «Ուզում եք մե՞նք նեղացնենք, մեր նեղացնելու ռեսուրսը շատ մեծ չէ»:
«Ստեղծվեց էական անհավասարակշռություն ՀՀ արտաքին քաղաքականության մեջ, ինչը ստեղծվել էր դեռ Ռ. Քոչարյանի վարչակարգի օրոք, երբ ամեն ինչ հանձնվեց ՌԴ-ին: Եվրոպայի մերձեցման քաղաքականությամբ փորձ էր արվում այդ անհավասարակշռությունը բերել որոշակի ընդունելի սահմաններ, բայց ՌԴ-ն դա չի հանդուրժում: ԵՄ-ն մեզ այլընտրանք չի առաջարկել անվտանգության առումով, Եվրոպան դա մեզ չի առաջարկել, ՆԱՏՕ-ից մենք նման պատրաստակամություն չենք տեսել: Առայժմ մենք կարող ենք բավարարվել նրանով, ինչով կարող ենք»,- մեկնաբանեց բանախոսը:
Նրա խոսքով՝ հետխորհրդային տարածքներում այս իրողությունները փոխվում են, և վաղը-մյուս օրը բախվելու ենք նրան, որ Վրաստանը ստորագրելու է պայմանագիրը և մտնելու է Եվրոպայի հետ տնտեսական հարաբերություններում ազատ առևտրի գոտի, նույնը՝ Ուկրաինան, Մոլդովան:
Քաղաքագետի կարծիքով՝ եթե Ուկրաինան չի մասնակցում ռուսական կայսերական պրոյեկտում, ապա այն հօդս է ցնդում, ուստի նոյեմբերին ընդառաջ՝ շատ փոփոխությունների կհանդիպենք:
«Ես կարծում եմ, որ ոչ թե փակվեցին դռները ՀՀ-ի առջև, այլ պարզապես Հայաստանի ընթացքը դանդաղեց, էապես դժվարացավ, ՀՀ-ն կորուստ կրեց: Ի վերջո պետք է լինի վեկտոր և դրա շուրջ՝ որոշակի ճկունություն, որը սպասարկի այդ վեկտորը»,- ասաց Ռուբեն Մեհրաբյանը:
