Vesti.az-ը հարցազրույց է վերցրել ղազախ քաղաքագետ Ղազախ Սարըմից։ Հարցազրույցում անդրադարձ է կատարվում Լեռնային Ղարաբաղի հակամարտությանը, Հայաստանի հնարավոր անդամակցությանը Մաքսային միությանը:
Քաղաքագետը, խոսելով ՄՄ-ին Հայաստանի հավանական անդամակցության մասին, նշել է. «Այսօր Ռուսաստանը Եվրասիական և Մաքսային միություններին անդամակցելու հարցերում ավելի շատ սիրաշահում է Ուկրաինային, քան Հայաստանին: Հասկանում եք՝ Հայաստանը շատ խնդրահարույց երկիր է, որը ուղիղ սահմաններ չունի Եվրասիական և Մաքսային միությունների անդամ երկրների հետ: Չնայած Հայաստանում բավականին ուժեղ է նրանց ազդեցությունը։ Նրանք կցանկանային, որ Հայաստանը անդամակցեր Մաքսային և Եվրասիական միություններին, սակայն խոսակցություններից այն կողմ գործը չի գնում»:
«Ընդհանուր առմամբ՝ ես շատ սկեպտիկորեն եմ վերաբերվում Եվրասիական միությանը: Արդյոք այն երբևէ կստեղծվի՞, և եթե ստեղծվի, որքա՞ն ժամանակ գոյություն կունենա: Սկզբունքորեն Ռուսաստանը Հայաստանին կարող է ներքաշել այդ միավորումներ Ղարաբաղի հետ, սակայն դա մեկընդմիշտ կփչացնի ռուս-ադրբեջանական և ռուս-թուրքական հարաբերությունները»,- ասել է նա:
Լրագրողի այն հարցին՝ արդյոք Ղազախստանը՝ որպես ՀԱՊԿ անդամ երկիր, կաջակցի՞ Հայաստանին՝ Լեռնային Ղարաբաղում պատերազմ սկսվելու դեպքում, քաղաքագետը պատասխանել է, որ իր կարծիքով՝ «ՀԱՊԿ-ը մահացած կազմակերպություն է, որում ներառվել են Ռուսաստանի հոսքի երկրները: Ուզբեկստանն արդեն դուրս է եկել ՀԱՊԿ-ից, և Ղազախստանը ևս պետք է մտածի այդ մասին»:
«Մենք բազմիցս մտածել ենք այդ սկզբունքային հարցի շուրջ. Եթե Ղարաբաղում պատերազմ սկսվի, ու՞մ կողմից պետք է կռվի Ղազախստանը: Ղազախստանի և Ադրբեջանի միջև գոյություն ունի ավելի սերտ կապ, քան ՀԱՊԿ մյուս անդամ երկրների միջև:Դա մեզ վրա որոշակի պարտավորություններ է դնում: Կարծում եմ՝ այդ դեպքում Ղազախստանը պետք է սկզբունքորեն որոշի՝ ի՞նչ ազգային առաջնային խնդիրներ ունի, ո՞ր երկրներն են իր համար ավելի կարևոր և բարեկամական: Այստեղ տնտեսության, մշակույթի ընդհանուր պատմության, լեզվի գործոն կա: Ես նույնիսկ չեմ դիտարկում հնարավորությունը, որի դեպքում Ղազախստանի զորքերը կկռվեն Ղարաբաղում՝ հայերի կողմից ընդդեմ Ադրբեջանի: Ավելին, համոզված եմ, որ Ղարաբաղում պատերազմ սկսվելու դեպքում Ղազախստանում հազարավոր մարդիկ պատրաստ կլինեն ինքնակամ կռվել Ադրբեջանի կողմից: Այդ պատճառով միտքն այն մասին, որ Ղազախստանը և Ղարաբաղը կկռվեն ընդդեմ Ադրբեջանի, անհեթեթ է, և ևս մեկ անգամ ցույց է տալիս այնպիսի կազմակերպության անհեթեթությունը, ինչպիսին է ՀԱՊԿ-ը: Այն ստեղծվել է բացառապես այն բանի համար, որպեսզի լոբբիացնի Ռուսաստանի շահերը: ՀԱՊԿ-ը սահմանափակում է ղազախստանի հարաբերությունների զարգացումը ՆԱՏՕ-ի և Արևմուտքի երկրների հետ: Կարծում եմ՝ ավելի հեռանկարային են հարաբերությունները Համագործակցության շանհայան կազմակերպության շրջանակներում, քանի որ դրանում Չինաստանը հավասարակշռում է Ռուսաստանի ազդեցությունը»,- նշել է քաղաքագետը:
