«Սա ակնհայտ ռազմավարական սխալ է և ևս մի կորցված հնարավորություն», «168 ժամ» պարբերականի թղթակցի հետ զրույցում այսպես է մեկնաբանել քաղաքագետ Ռիչարդ Կիրակոսյանը Մաքսային միություն մտնելու մասին նախագահ Սերժ Սարգսյանի հայտարարությունը: Ռիչարդ Կիրակոսյանը կարծիք է հայտնել, որ Մաքսային միությանը միանալով և Եվրոպայի առջև դուռը փակելով՝ Հայաստանը կրկին ամբողջությամբ կընկնի Ռուսաստանից կախման մեջ:
«Այս որոշմամբ աշխարհը երես է թեքում Հայաստանից»,- ասել է Ռ. Կիրակոսյանը: Նա նաև ավելացրել է, որ Ռուսաստանը հարգում է ուժը, և «առանց նախապայմանների Ռուսաստանին հանձնվելու այս որոշումը» ցույց է տալիս Հայաստանի իշխանությունների թուլությունը, այլ ոչ թե ուժը: «Սա աշխարհագրական խնդիր է նաև Հայաստանի նախագահի համար, այս որոշումը նրան անկյուն կանգնեցրեց՝ սահմանափակելով նրա հնարավորությունները և պետության ապագան»,- ասել է նա: Ռիչարդ Կիրակոսյանը նաև չի բացառել այն տարբերակը, որ Մաքսային միության ընտրության հարցն իրականում կապված էր Ռուսաստանի կողմից ֆինանսական աջակցության հետ, և նշել է. «Կարծես թե Հայաստանի նախագահին ավելի հետաքրքրում է շտապ կանխիկ գումարը, քան թե երկարաժամկետ հեռանկարում ԵՄ-ի հետ համագործակցությունից ակնկալվող շահույթները»:
Հոդվածն ամբողջությամբ՝ կարդացեք «168 ժամ»-ի այսօրվա համարում:
